Incidenti jashtë Kuvendit, deputeti i VV-së: Urdhërdhënësi i sulmit dihet, nuk ka falje që e mbyll rastin

Deputeti i Lëvizjes Vetëvendosje, Fahrush Rexhepi, ka bërë të ditur se është bërë cak i një incidenti nga protestuesit e pranishëm jashtë ndërtesës së Kuvendit të Kosovës, menjëherë pas përmbylljes së punimeve të seancës plenare. Nëpërmjet një deklarate publike, ligjvënësi e ka cilësuar ngjarjen si të patolerueshme, duke rikujtuar angazhimin e tij dhe të familjes së tij në Ushtrinë Çlirimtare të Kosovës dhe në përpjekjet e gjata për çlirimin e vendit. "Prandaj, ajo që ndodhi sot më dhemb. Jo vetëm për atë që më ndodhi mua, por sepse akte të tilla nuk i bëjnë nder as Kosovës, as sakrificës së popullit tonë dhe as vlerave për të cilat luftuam", ka shkruar ndër të tjera Rexhepi. Megjithëse disa nga personat e përfshirë në këtë ngjarje kanë shprehur pendesë dhe kanë kërkuar takim për t'i kërkuar falje, deputeti ka theksuar se një veprim i tillë nuk mjafton për të kaluar situatën. Sipas pohimeve të tij, tashmë është zbuluar edhe identiteti i personit që qëndron pas këtij organizimi, të cilin ai e ka cilësuar si “urdhërdhënësin e sulmit”. "Rastin do ta procedoj tutje në organet kompetente të rendit dhe drejtësisë së Republikës së Kosovës", ka përfunduar deklaratën e tij zyrtari i Lëvizjes Vetëvendosje.