Fjalimi 25-minutësh i Ramës në OKB: Nga rreziku i Inteligjencës Artificiale te “Revolucioni i Flamingove” në Tiranë

Kryeministri i Shqipërisë, Edi Rama, gjটায় fjalimin e tij në Asamblenë e Përgjithshme të OKB-së në New York, ka tërhequr vëmendjen te rreziqet që Inteligjenca Artificiale dhe mjetet digjitale paraqesin për shoqërinë dhe sistemin demokratik. Duke marrë si shembull rastin e pagëzuar prej tij si “Revolucioni Flamingo”, Rama argumentoi se dezinformimi i orientuar dhe narrativat e montuara kanë aftësinë të ndryshojnë rrënjësisht mënyrën se si qytetarët kuptojnë dhe reagojnë ndaj realitetit. Kreu i Qeverisë shqiptare nënvizoi se sfida më e madhe për demokracitë e sotme nuk është më vetëm censura tradicionale, por shfrytëzimi keqdashës i fuqisë së shpërndarjes, duke bërë thirrje për transparencë më të madhe rreth burimit, financimit dhe amplifikimit të informacioneve në hapësirën digjitale. Duke rrëfyer detajet e këtij fenomeni, Rama u shpreh: “Jam i sigurt se e keni ndjekur ose të paktën e njihni të ashtuquajturin “Revolucioni Flamingo”. Një narrativë e fabrikuar për një pushtim izraelit të bregdetit shqiptar, një pushtim që nuk ndodhi kurrë, u krijua, u personalizua dhe u shpërnda përmes zërave, faqeve dhe kanaleve që qytetarët i besonin tashmë”. “Një qytetar mori një histori për tradhti kombëtare. Një tjetër mori një histori për provokim fetar. Një tjetër mori një teori konspirative për pushtim të huaj. Publikime të ndryshme hynë në botë të ndryshme emocionale, të gjitha duke i shërbyer së njëjtës gënjeshtër strategjike”, shtoi ai. Më tej, ai theksoi se pasojat e këtyre manipulimeve ishin plotësisht reale: “Qytetarët kishin arsyet e tyre për të protestuar, mos më keqkuptoni. Por papritur ata nisën të protestonin edhe kundër një armiku fantazmë. Frika u shndërrua në zemërim. Zemërimi u shndërrua në mobilizim dhe fabrikimi u shndërrua në realitet politik. Dhe kjo nuk është dhe nuk ishte një eksperiment laboratorik. Nuk po ju flas për një film fantastiko-shkencor”. “Ishte një e martë në Tiranë, kryeqytetin tonë. Algoritmi nuk e shpiku objektivin. E bëri një aktor njerëzor. Algoritmi nuk zhvilloi urrejtje. Ai zbuloi se si të aktivizonte urrejtjen tonë. Ky është mashtrimi sistematik si shërbim”, u shpreh kryeministri gjatë fjalës së tij. Sipas Ramës, ndërhyrja në proceset zgjedhore nuk ka më nevojë për ekrane televizive apo fushata të njëjta për të gjithë popullsinë, pasi çdo votues mund të jetë shënjestër e veçantë. “Dy fqinj mund të qëndrojnë në të njëjtën rrugë, të votojnë në të njëjtat zgjedhje dhe të jetojnë në realitete krejtësisht të ndryshme, secili prej tyre të krijuar posaçërisht për to”, u shpreh ai, duke shtuar se në këtë mënyrë demokracia humbet terrenin e përbashkët të debatit. Duke folur për konceptin e sovranitetit në shekullin XXI, ai theksoi se ai nuk cënohet më vetëm në kufijtë fizikë, por edhe brenda hapësirës digjitale të rrjeteve tona sociale, duke kërkuar mbrojtje të kushteve ku qytetarët formojnë gjykimet e tyre të lira, ndërsa vuri në dukje se liria e fjalës sot rrezikohet nga armatosja e fuqisë së shtrirjes, e cila mund të blihet dhe manipulohet.