Dramë në volejboll: Partizani dhe Studenti sigurojnë biletën për finalen e Kupës së Federatës

Kupa e Federatës në volejboll për meshkuj ka marrë formën e saj përfundimtare, pasi pasditen e së premtes u zhvilluan përballjet gjysmëfinale në Farkë, të cilat dhuruan spektakël dhe rivalitet të lartë sportiv. Në ndeshjen e parë, Studenti arriti një fitore të rëndësishme me përmbysje ndaj Erzenit, duke e mbyllur takimin me rezultatin 3-1. Ndonëse skuadra nga Shijaku e nisi sfidën me më shumë autoritet, volejbollistët kryeqytetas gjetën forcën për të reaguar që në setin e dytë, duke dominuar më pas lojën në dy setet pasardhëse dhe duke siguruar kështu kalimin në finale. Momenti kulmor i ditës ishte derbi i kryeqytetit mes Partizanit dhe Tiranës, një ndeshje që mbajti publikun në tension deri në sekondat e fundit. Tirana e nisi takimin në mënyrën më të mirë të mundshme, duke fituar dy setet e para, por Partizani tregoi karakter të hekurt duke u rikthyer fuqishëm. “Të kuqtë” arritën të përmbysin gjithçka në favorin e tyre, duke fituar tri setet e fundit dhe duke prerë biletën për në aktin final të këtij kompeticioni. Rezultatet e ndeshjeve gjysmëfinale: Studenti – Erzeni: 3-1 (21-25, 25-23, 25-14, 25-19) Partizani – Tirana: 3-2 (22-25, 21-25, 25-21, 25-14, 15-10)