Bokset kosovare shkëlqejnë në arenën ndërkombëtare, por sfidat financiare mbeten pengesë kryesore

Pavarësisht rezultateve kulmore dhe medaljeve të fituara, Federata e Boksit të Kosovës vazhdon të përballet me ngërçe të theksuara financiare. Sekretari i kësaj federate, Latif Demolli, ka vënë inë pah se mungesa e sponsorëve privatë e bën jashtëzakonisht të vështirë organizimin e kampeve stërvitore dhe përgatitjeve speciale për sportistët tonë. Gjatë një paraqitjeje në podkastin "SportCast", Demolli shpjegoi se burimi i vetëm i financimit aktualisht mbetet Ministria e Sportit. Megjithatë, ai bëri të ditur se vonesat disamujore në disbursimin e mjeteve të memorandumit – i cili për këtë vit kap shifrën e rreth 246 mijë eurove – shkaktojnë probleme serioze në planifikimin e aktiviteteve. Si shembull, ai përmendi kostot e larta të udhëtimit, ku vetëm biletat e avionit për në turnemin kualifikues në Brazil kushtuan afër 3 mijë euro për person, duke lënë boshllëqe në buxhetin e garave ndërkombëtare. “Ne nuk kemi një sponsor që do të na ndihmonte, sidomos për përgatitjet speciale dhe kampet në lartësi mbidetare. Të gjitha mjetet i sigurojmë nga Ministria e Sportit. Edhe pse kemi një memorandum mjaft të mirë prej 246 mijë eurosh, pjesa e dytë e tij u vonua për tre-katër muaj. Për shkak të garave, akomodimit dhe biletave të shtrenjta, ne mbetemi pa mjete për një plan strategjik të fuqishëm. Megjithatë, ne ia dalim në fund përmes huazimeve nga miqtë, të cilat i shlyejmë sapo na vijnë fondet nga ministria. Nuk mund t'i lëmë boksierët pa marrë pjesë në evropiane apo ngjarje të tjera, pasi është ëndrra e tyre dhe obligimi ynë që t'i dërgojmë për të matur forcat”, u shpreh Demolli. Përkundër pengesave të shumta, Demolli theksoi se viti 2025 ka qenë jashtëzakonisht i suksesshëm në aspektin e trofeve, duke dëshmuar punën e palodhshme që po bëhet brenda federatës. “Sipas kushteve që kemi, mund të themi se jemi jashtëzakonisht mirë. Këtë vit kemi shënuar suksese historike, duke nisur nga medalja e artë mesdhetare e Donjeta Sadikut. Vetëm dy javë më vonë, ajo fitoi edhe medaljen e bronztë evropiane, ndërsa boksieri Shpejtim Bajoku u rendit në vendin e pestë. Këto dy medalje të mëdha ndërkombëtare janë një arritje e jashtëzakonshme dhe më se e mjaftueshme për një federatë brenda një viti”, shtoi ai. Kjo periudhë shënon një nga etapat më të suksesshme sportive për boksin e Kosovës, ku figura të tilla si Donjeta Sadiku dhe Shpejtim Bajoku po ngrisin lart flamurin shtetëror në ngjarjet më prestigjioze globale. Megjithatë, përtej lavdisë në ring, sigurimi i kushteve optimale stërvitore mbetet një sfidë e përhershme që kërkon vëmendje të re. Për këtë arsye, përkrahja e vazhdueshme institucionale dhe hapja e dyerve për investitorë e sponsorë të rinj janë jetike për ndërtimin e një strategjie afatgjatë, e cila do t'u garantojë boksierëve kosovarë kushte edhe më të favorshme për t'u ngjitur në majat e boksimit botëror.