Apeli i fortë i Tahirit ndaj LVV-së: Pse po zvarritet Projektligji për Specialen, a po prisni përshkallëzim?

Shefi i Grupit Parlamentar të Aleancës për Ardhmërinë e Kosovës, Besnik Tahiri, i ka bërë thirrje publike Lëvizjes Vetëvendosje dhe legjislatorëve të Kuvendit të Kosovës që ta kthejnë pa humbur kohë në sallë Projektligjin për Dhomat e Specializuara për ta kaluar në lexim të dytë. Sipas Tahirit, nuk ekziston asnjë justifikim i vlefshëm për ta mbajtur këtë proces peng, sidomos duke pasur parasysh faktin se iniciativa tashmë ka siguruar mbështetjen e mjaftueshme të deputetëve gjatë votimit në lexim të parë. Duke shprehur shqetësimin e tij për zhvillimet aktuale, ai ngriti alarmin se vonesat mund të çojnë në tensionim të situatës, prandaj kërkoi veprim të menjëhershëm për votimin përfundimtar të ligjit. “Pyetja është, çka po presim, çka është duke prit shumica, LVV, çka është duke prit. Pse nuk e sjell ligjin? Çfarë duhet të ndodhë më shumë, se shihni, çka është duke ndodhur rreth e rreth Kuvendit Republikës së Kosovës, kaloj ligjin në lexim të parë me miratim dhe mbështetje të Lëvizjes Vendosje, të Partisë Demokratike si sponsorues, të Aleancës, të pakicave, çka po presim?”, u shpreh ai ndër të tjera, duke shtuar se rregullorja e punës, përfshirë nenin 85 dhe nenin 123, krijojnë hapësirën e duhur për përmbylljen e këtij procesi. Tutje, Tahiri qartësoi se bllokada e krijuar nuk ka të bëjë me ndonjë pazar apo pakt politik që përfshin partinë e tij, por mbetet e lidhur ngushtë me çështjen e leximit të dytë dhe atë të presidentit, ndërkohë që subjekti i tij po e vëzhgon me shqetësim të madh dinamikën brenda dhe jashtë mjediseve të Kuvendit.