Fjalor skandaloz në Komisionin e Ligjeve: Olsi Komici etiketon demokratët, plas debati për telefonat dhe etikën

Mbledhja e Komisionit të Ligjeve është përfshirë nga tensione të larta dhe replika të ashpra mes deputetëve, pasi shkak është bërë një deklaratë fyese e deputetit Olsi Komici, i cili iu drejtua disa kolegëve të opozitës me termin “të qelbur”. Përplasja verbale nisi fillimisht rreth një episodi filmimi me celular gjatë zhvillimit të punimeve të komisionit. Në kulmin e debateve, Komici u shpreh hapur duke përmendur “5 demokratë të qelbur”, çka solli reagimin e menjëhershëm të deputetes së pranishme. E indinjuar nga gjuha e përdorur, ajo iu kundërvu duke i kërkuar llogari dhe duke i kujtuar se një fjalor i tillë nuk i ka andaj një anëtari të Kuvendit. Ndërkohë, debati u nxeh edhe më shumë kur në mes u përfshi deputeti Gent Strazimiri, i cili kërkoi që Komici të kërkonte falje publike për fyerjen e bërë. Debati vijoi me ndërhyrje nga kryetari i komisionit, Ulsi Manja, i cili u përpoq të qetësonte situatën dhe të rikthente rendin e seancës. Manja theksoi se votimi është publik dhe se mbledhjet janë të hapura për regjistrime, duke apeluar për respektimin e rregullave të bashkëjetesës institucionale, pavarësisht bindjeve politike. Megjithatë, situata mbeti e tensionuar, ndërsa Gent Strazimiri e quajti veprimin e Komicit ndaj deputetes si provokim dhe kërkoi që kërkimfalja të pasqyrohet në proces-verbal. Nga ana e tij, pas kërkesave të vazhdueshme për llogaridhënie, Olsi Komici ofroi një falje të pjesshme, duke u drejtuar vetëm te zoti Mehdi Leka si bashkëpatriot i tij, ndërsa këmbënguli se mbetet i vendosur në përfaqësimin e votuesve të tij.