“Edhe Besiani i përket kombit tonë” – Përplasje e ashpër e Tahirajt me Çitakun për Gjykatën Speciale

Veprimtari i njohur, Saim Tahiraj, ka lëshuar një reagim të ashpër ndaj deputetes së Partisë Demokratike të Kosovës, Vlora Çitaku, lidhur me qëndrimet e kësaj të fundit rreth nismës për ndryshimet në Ligjin për Gjykatën Speciale. Kritika e Tahirajt është fokusuar te përdorimi i sintagmës “obligim kombëtar” nga ana e Çitakut, duke e cilësuar këtë si një etiketim të gabuar. Sipas tij, një vendim i tillë mund të përfaqësojë vetëm një interes apo detyrim partiak, por në asnjë mënyrë nuk mund të identifikohet me interesin mbarëkombëtar, ndërkohë që ka kërkuar zbardhjen e plotë të drejtësisë për të gjitha viktimat dhe familjet e tyre. Në reagimin e tij publik, Tahiraj është drejtuar me tone të ashpra: “Kush jua dha të drejtën të caktoni dhe detyroni si obligim kombëtar votimin e ndryshimit të ligjit për Gjykatën Speciale në Hagë? Ku e morët dhe kush jua dha këtë të drejtë të merrni në pronësi dhe të flisni në emër të Kombit Shqiptar? Jeni të vegjël ta keni këtë pronësi që është e të gjithë shqiptarëve, andaj uleni këtë shpejtësi që po ua dërgon në thyqafje. Drejtësia duhet të vihet në vend, sado që ajo ju dhemb, e këtë mund ta bëjë vetëm Gjykata Speciale në Hagë. Për vite të tëra ju e penguat atë, duke kapur institucionet e drejtësisë, e tani po përpiqeni të pengoni edhe këtë gjykatë, që është e vetmja shpresë për familjarët e viktimave politike, për të vendosur drejtësi për ta.” Më tej, ai ka sjellë në vëmendje rastin e deputetit të Lidhjes Demokratike të Kosovës, Besian Mustafa, duke e ftuar Çitakun të reflektojë mbi vuajtjet e familjes së tij. “Zonjë, keni pyetur ndonjëherë deputetin e LDK-së, Besian Mustafën, për dhimbjen që ka ai dhe familja e tij? Edhe Besiani, si qindra familjarë që ju vranë më të dashurit e tyre për motive politike, janë pjesë e Kombit Shqiptar. Atëherë, me çfarë morali njerëzor e quani obligim kombëtar votimin e ndryshimit të ligjit për Gjykatën Speciale?” – ka shtuar ai. Në përmbyllje të qëndrimit të tij, Tahiraj ka përsëritur se për PDK-në kjo çështje mund të ketë vetëm prapavijë të interesit partiak, por jo kombëtar, duke theksuar se shumica e qytetarëve qëndrojnë në krah të familjeve të viktimave të vrasjeve politike në kërkim të drejtësisë. “Do t’ju sugjeroja që herën tjetër ta korrigjoni veten dhe si obligim kombëtar ta thoni ju dhe ne të gjithë me një zë: DREJTËSI DHE VETËM DREJTËSI PËR TË GJITHË BARABART,” ka përfunduar reagimi i tij.