Premtimi i çmendur i tifozit të Unitedit: Tërheq vëmendjen e Ruben Amorimit në një takim urgjent

Frank Ilett, mbështetësi i njohur i Manchester Unitedit që ka vendosur të mos i presë flokët derisa skuadra e tij të regjistrojë pesë fitore radhazi, është takuar gjatë ditës së djeshme me trajnerin Ruben Amorim, i cili i ka kërkuar falje në një atmosferë plot humor. Ngjarja ka ndodhur të enjten në kuadër të “Portugal Football Summit”, ku trajneri aktual i Milanit pati një çast ndërveprimi me Ilettin. Ky i fundit nuk ka hezituar të ndajë momentin me ndjekësit e tij në platformën “Instagram”, duke publikuar një fotografi të përbashkët me strategun portugez. “Ishte një kënaqësi e jashtëzakonshme të takoja Ruben Amorimin në ‘Portugal Football Summit’”, ka shkruar Ilett në rrjetet sociale. Sipas tij, sapo trajneri e ka parë, ka reaguar menjëherë duke i drejtuar vështrimin te flokët e tij të paprerë dhe i ka thënë me të qeshur: “Më fal për këtë!”. Megjithatë, tifozi ka shtuar se pavarësisht gjithçkaje, ai vazhdon ta respektojë. Gjatë periudhës 14-mujore në krye të Manchester Unitedit, ku u emërua në nëntor të vitit 2024 dhe u shkarkua në janar të vitit 2026, Amorim regjistroi vetëm 25 fitore nga 63 ndeshje gjithsej, duke dështuar kështu të arrijë serinë prej pesë fitoresh rresht. Pas largimit nga Anglia, portugezi mori drejtimin e Milanit verën e kaluar, duke firmosur një marrëveshje trevjeçare për të pasuar në stol Massimiliano Allegrin. Nën drejtimin e tij, gjiganti italian po kalon një formë të mirë në Serie A këtë edicion, duke qenë i pamposhtur në pesë ndeshjet e para me tri fitore e dy barazime, ndërsa e vetmja humbje e këtij sezoni mbetet ajo përballë Benficas në Ligën e Evropës.