Kujdes nga këto 4 gabime në tualet që dëmtojnë rëndë shëndetin e zorrëve tuaja

Kur bëhet fjalë për një sistem tretës të shëndetshëm, zakonisht fokusohemi te ushqimi që konsumojmë, por mënyra se si përdorim tualetin luan një rol po aq jetik. Sipas ekspertëve, disa veprime të përditshme mund të ndikojnë negativisht te shëndeti gastrointestinal. Gastroenterologia e njohur Dr. Susan Case thekson se, përveç dietës, zakonet tona në banjë mund të jenë shkak i shfaqjes së hemorroideve dhe problemeve të tjera të zorrëve. Për këtë qëllim, ajo ka listuar katër sjellje të zakonshme që duhen shmangur menjëherë. Një nga gabimet më të shpeshta është shpërfillja e sinjaleve për të kryer theksuar nevojën e jashtëqitjes. Nëse kjo ndodh herë pas here nuk përbën rrezik, por nëse praktikohet rregullisht, shkakton kapsllëk. "Sa më gjatë të qëndrojë jashtëqitja në zorrën e trashë, aq më shumë ujë thithet prej saj, duke e bërë atë shumë më të thatë dhe më të vështirë për t’u nxjerrë jashtë", shpjegon Dr. Case. Ajo shton se kjo sjellje e stërvit zorrën që të mbajë më shumë mbetje, duke krijuar një cikël vicioz problemesh. Një tjetër zakon i dëmshëm është mbajtja e telefonit gjatë qëndrimit në banjë. Shfletimi i faqeve bën që njerëzit të humbasin ndjenjën e kohës dhe të qëndrojnë ulur shumë më gjatë se ç'duhet. "Qëndrimi ulur për një kohë të gjatë në tualet rrit presionin mbi venat rreth rektumit dhe anusit, gjë që mund të kontribuojë në hemorroide ose të përkeqësojë ato ekzistuese", paralajmëron mjekja, duke sugjeruar që telefonin ta lëmë jashtë këtij mjedisi. Sforcimi i tepërt gjatë lëvizjeve të zorrëve është gjithashtu një praktikë që duhet eliminuar. Tensionimi i rregullt rrit presionin në zonën anale dhe mund të shkaktojë çarje e hemorroide. "Nëse duhet të sforcoheni, kjo është shpesh një shenjë se jashtëqitja juaj është shumë e fortë dhe keni kapsllëk", thotë ajo, duke këshilluar që në vend të sforcimit, të analizohet mungesa e fibrave, e ujit apo e aktivitetit fizik në jetën e përditshme.