Kosova përfiton miliona euro: Kuvendi i hap rrugën tre marrëveshjeve të rëndësishme me Bashkimin Evropian

Gjatë seancës së jashtëzakonshme të mbajtur sot, Kuvendi i Kosovës ka dhënë dritën jeshile për miratimin e tri projektligjeve kyçe që lidhen me ratifikimin e pakove financiare me Bashkimin Evropian, të ndara në kuadër të programeve IPA 2021, IPA 2022 dhe IPA 2026–2027. Ligjvënësit votuan pro projektligjit për ratifikimin e amendamentit numër 1 të marrëveshjes financiare për programin IPA 2021. Ky hap siguron vazhdimësinë e proceseve për kontraktimin dhe shfrytëzimin efikas të fondeve evropiane në vlerë prej 22.2 milionë eurosh. Po ashtu, përmes ratifikimit të marrëveshjeve të tjera, i hapet rruga shfrytëzimit të një mbështetjeje shtesë prej 55.7 milionë eurosh nga blloku evropian për projekte konkrete. Në anën tjetër, programi afatgjatë IPA 2026–2027 përfshin iniciativa zhvillimore me një buxhet total që kap shifrën e 193.856 milionë eurove. Prej kësaj shume totale, rreth 180.5 milionë euro përbëjnë grant direkt nga Bashkimi Evropian, ndërsa pjesa e mbetur mbulohet përmes bashkëfinancimit nga ana e Qeverisë së Kosovës dhe aktorëve të tjerë ndërkombëtarë partnerë në zhvillim.