Lehtësim në pompim: Maqedoni e Veriut ul çmimet e karburanteve nga kjo e martë

Komisioni Rregullator i Energjetikës, i Shërbimeve të Ujit dhe i Shërbimeve të Menaxhimit me Mbeturina Komunale i Republikës së Maqedonisë së Veriut (KRRE) ka miratuar një vendim të ri, i cili parashikon zvogëlimin e çmimeve të shitjes me pakicë të derivateve të naftës me një mesatare prej 1,85 % krahasuar me vendimin e datës 28.9.2026. Sipas këtij vendimi, benzinat EUROSUPER BS-95 dhe EUROSUPER BS-98 do të regjistrojnë një ulje prej 1,50 denarë për litër. Ndërkohë, vlera e shitjes me pakicë për EURODIZELIN (D-E V) shënon një rënie prej 3,00 denarë për litër, aq sa do të lirohet edhe Vaji Ekstra i Lehtë për Amvisëri (EL-1). Sa i përket derivateve industriale, çmimi i shitjes me pakicë i Mazutit M-1 SU do të pësojë një zbritje prej 0,285 denarë për kilogram, duke u vendosur në kuotën e 49,597 denarëve për kilogram. Këto ndryshime të reja tarifore do të hyjnë në fuqi duke filluar nga data 6.10.2026, prej orës 00:01, kohë kur çmimet maksimale të derivateve të naftës do të llogariten si vijon: EUROSUPER BS - 95 do të shitet për 98,50 denarë për litër. EUROSUPER BS - 98 do të shitet për 100,50 denarë për litër. EURODIZEL BS (D-E V) do të shitet për 97,00 denarë për litër. Vaj për Djegie Ekstra i Lehtë 1 (EL-1) do të shitet për 108,50 denarë për litër. Mazut М-1 SU do të shitet për 49,597 denarë për kilogram.