Debat i nxehtë në Kuvend për Bordin e ZRRE-së, opozita shigjeton Qeverinë për politizim të procesit

Kuvendi i Kosovës ka hapur rrugën për zgjedhjen e dy anëtarëve të rinj të Bordit të Zyrës së Rregullatorit të Energjisë (ZRRE), duke shkaktuar njëkohësisht përplasje dhe kritika të forta nga opozita lidhur me kriteret e ndjekura në përzgjedhjen e kandidatëve qeveritarë. Gjatë seancës plenare, deputeti i Lëvizjes Vetëvendosje, Taulant Kelmendi, bëri të ditur se ligjvënësit do të votojnë përmes një procesi të fshehtë për të zgjedhur dy nga katër pretendentët e propozuar, të cilët do të mbajnë mandat pesëvjeçar. Ai kërkoi mbështetjen e Grupit Parlamentar të LVV-së, duke nënvizuar se plotësimi i këtij institucioni është i një rëndësie jetike. “Kuvendi të zgjedh me votim të fshehtë dy nga katër kandidatët e propozuar nga Qeveria për anëtar të bordit të ZRRE-së me mandat pesëvjeçar. Emrat janë si vijon, Driton Gojani, Lutfie Dervishi, Hana Jakupi dhe Senat Bolluzerti. Po ashtu në emër të Grupit Parlamentar të LVV-së shpreh mbështetjen për zgjedhjen e anëtarëve të bordit duke pas parasysh se është shumë e rëndësishme funksionalizimi i këtij institucioni”, deklaroi Kelmendi nga foltorja. Në krahun tjetër, reagimet kritike nuk munguan nga radhët e Partisë Demokratike të Kosovës (PDK). Deputeti Arben Mustafa vuri në pikëpyetje transparencën dhe kriteret e përdorura nga ekzekutivi për të filtruar katër emrat që kanë mbërritur në tavolinën e Kuvendit. “Për sa i përket këtij procesi të votimi deputetet kanë pranuar një listë të kandidatëve të rekomanduar për votim, por, shtrohet pyetja se mbi çfarë kriteri janë zgjedhur këta katër emra që kanë propozuar kuvendit për votim. Nga lista e vlerësimeve që kemi pranuar, shohim që nuk janë rekomanduar kandidatët që kanë marrë numrin më të madh të pikëve për vlerësim, por, janë propozuar të zgjedhën kandidat që janë nga fundi i listës për vlerësimin që kanë marrë. Për çka ka shërbyer ai proces i vlerësimit dhe intervisitmit të kandidatëve...Ky proces është imporvizim, nuk ka të bëjë me zgjedhjen e kandidatëve më të mirë për bordin e ZRRE-së, por, përkundrazi është proces i politizuar me të cilin dëshironi t’i dërgoni kandidatët e juaj të preferuar”, u shpreh Mustafa. Pakënaqësi të ngjashme shfaqi edhe Lidhja Demokratike e Kosovës (LDK). Deputeti Ermal Sadiku sqaroi se komisioni vlerësues kishte renditur 13 kandidatë në bazë të pikëve, suksesit akademik dhe përvojës profesionale, por sipas tij, Qeveria ka anashkaluar emrat më të merituar. “Komisioni vlerësues i ka vlerësuar 13 kandidatë me një renditje të caktuar në baza të pikëve si dhe eksperiencave të punës, shkollimit etj. Kur është bërë renditja e atyre kandidatëve, personi më i vlerësuar, personi i tretë dhe i katërt më i vlerësuar nuk janë përzgjedh me ardhë këtu para juve. Është përzgjedh personi i dytë, i shtatë, i tetë dhe saktë më duket i gjashti. Sot po kërkohet që me votën e juaj të votohen disa persona që nuk kanë merituar në bazë të vlerësimit me qenë sot në këtë sallë. Këtë vlerësim e ka bërë një komision i pavarur në bazë të informatave që ka pas. Kam lut mos me bë këtë dëmë”, tha Sadiku. Debatit iu bashkua edhe deputeti i Aleancës për Ardhmërinë e Kosovës (AAK), Burim Ramadani, i cili kërkoi llogaridhënie institucionale, duke vënë njoftuar se dosja zyrtare nuk përmban asnjë shpjegim mbi shmangien e renditjes meritore të komisionit rekomandues. “Në dosjen që kemi marrë në komision nuk është asnjë arsyetim i vetëm pse nuk është përfill lista sipas komisionit rekomandues”, përfundoi Ramadani.