Operacion ndërkombëtar: Ekstradohet nga Brazili 67-vjeçari nga Shkodra i dënuar me 26 vite burg

Operacioni policor i koduar “The Wanted” ka shënuar një tjetër sukses, pas finalizimit të procedurave për sjelljen në Shqipëri të një 67-vjeçari nga qyteti i Shkodrës. Si rezultat i bashkëpunimit të ngushtë ndërmjet ekspertëve të Interpol Tiranës dhe autoriteteve ligjzbatuese në Brazil, u bë i mundur ekstradimi i shtetasit Artef Lekaj. Ky person ishte shpallur në kërkim ndërkombëtar, pasi figuron i dënuar me 26 vjet burgim nga organet e drejtësisë vendase. Konkretisht, Gjykata e Shkallës së Parë e Juridiksionit të Përgjithshëm Shkodër e kishte shpallur fajtor për veprat penale “Marrëdhënia seksuale ose homoseksuale cu të mitur” dhe “Ngacmimi seksual”, një vendim që më pas është lënë në fuqi dhe ka marrë formë të prerë nga Gjykata e Apelit e Juridiksionit të Përgjithshëm Tiranë. Sipas dosjes hetimore, ngjarjet për të cilat akuzohet 67-vjeçari kanë ndodhur gjatë harkut kohor 2020-2021. Ai dyshohet se ka ngacmuar seksualisht një të mitur vetëm 10 vjeç, si dhe ka kryer abuzim seksual ndaj një tjetër të miture, e cila në atë kohë ishte 15 vjeçe. Menjëherë pas mbërritjes së tij në territorin shqiptar, specialistët e Hetimit të Krimeve pranë Komisariatit të Policisë Shkodër kanë ndërmarrë hapat proceduralë për ekzekutimin e vendimit penal të dhënë nga Gjykata e Apelit, duke e dërguar përfundimisht në qeli.