Superliga e Kosovës në hendboll: Kastrioti, Besa Famgas dhe Llapi regjistrojnë fitore të rëndësishme në xhiron e dytë

Gjatë ditës së diel janë zhvilluar tri takimet e vlefshme për xhiron e dytë në Superligën e Kosovës në hendboll, në kategorinë e meshkujve, ku skuadrat favorite kanë arkëtuar pikët e plota. Kampioni në fuqi, Kastrioti, ka shënuar një fitore bindëse në qytetin e Ferizajt, duke mposhtur Prishtinën me rezultatin 45:33. Te skuadra ferizajase, lojtari më i dalluar në aspektin efikasitetit ishte Eray Karakoç me gjashtë gola, i ndjekur nga Alban Haziri, Vuk Lakiçeviq dhe Gent Bajrami, të cilët kontribuan secili me nga pesë realizime. Ndërkaq, te kryeqytetasit u dallua Enis Kuleta me dhjetë gola, si dhe Ylli Visoka me nëntë të tjerë. Një duel mjaft i fortë dhe me rivalitet të lartë u luajt në palestrën e Gjakovës, ku Besa Famgas arriti të triumfojë ndaj Vëllaznimit me vetëm tre gola diferencë, 31:28. Për mysafirët nga Peja, shënuesi më i mirë ishte Ilir Istrefaj me tetë gola, ndërsa Jon Muqolli dhe Yassine Henahen shtuan nga gjashtë secili. Te kuqezinjtë nga Gjakova, Ardi Halili realizoi shtatë herë, kurse Mali Luzha dhe Granit Kadiri realizuan nga gjashtë gola. Në ndeshjen e tretë të kësaj xhiroje, Llapi ka shënuar një fitore të rëndësishme si mysafir kundër Rahovecit, duke triumfuar me shifrat 43:33. Ekipi nga Podujeva u udhëhoq drejt këtij suksesi nga Santos de Souza Kaiq, i cili shënoi tetë gola, një më shumë se bashkëlojtarët e tij Artir Muçiqi dhe Victor Ramirez Rios. Për vendasit e njohur si “vreshtarët”, më i saktë para portës ishte Ylli Morina me shtatë finalizime të suksesshme.