Avdullahu pas barazimit dramatik me Austrinë: Humbëm përqendrimin në momentet e fundit

Mesfushori i Përfaqësueses së Kosovës, Leon Avdullahu, ka ndarë përshtypjet e tij pas përfundimit të sfidës ndaj Austrisë, e cila u mbyll pa fitues në stadiumin “Fadil Vokrri”. Kosova ishte shumë pranë triumfit, por austriakët arritën të barazonin rezultatin në pesë minutat e fundit të takimit, duke bërë që “Dardanët” të lëshojnë nga duart tri pikët e plota. Duke folur për media pas ndeshjes së vlefshme për xhiron e katërt të Ligës B në Ligën e Kombeve, mesfushori dardan pranoi se rënia e përqendrimit në fushë i kushtoi shtrenjtë skuadrës. “Sonte i kemi humbur dy pikë, pasi e humbëm përqendrimin në fund. Në këtë ndeshje dëshmuam se mund të paraqitemi në nivel të lartë edhe përballë kombëtareve të mëdha”, deklaroi ai. Pas këtij barazimi 1-1, Kosova regjistron pesë pikë pas katër ndeshjeve të zhvilluara, ndërsa Austria ngjitet në kuotën e tetë pikëve.