Përballja e madhe në “Fadil Vokrri”: Kosova kërkon revanshin ndaj Austrisë, zbulohet formacioni i mundshëm

Tifozët e futbollit në vend janë në pritje të ndeshjes së madhe mes Kosovës dhe Austrisë, e cila do të nisë zyrtarisht në orën 18:00 në stadiumin “Fadil Vokrri”. Përfaqësuesja kosovare synon me çdo kusht kthesën dhe hakmarrjen sportive ndaj kundërshtarit austriak, pas humbjes së regjistruar vetëm shtatë ditë më parë në Vjenë me shifrat 3:1. Një triumf i mundshëm në këtë përballje do të kishte peshë specifike dhe do të hidhte një hap tejet të sigurt për Kombëtaren e drejtuar nga tekniku Franco Foda drejt ngjitjes në Ligën A të Ligës së Kombeve. Ndërkohë, me afrimin e orës së ndeshjes, janë zbuluar edhe detajet e para taktike, ku “Dardanët” pritet të zbresin në fushë me skemën e njohur 3-4-3. Reparti defensiv pritet t’i besohet treshes së përbërë nga Ron Raçi, Ilir Krasniqi dhe Lumbardh Dellova. Pozitat e mesfushorëve të krahut më të avancuar pritet të mbulohen nga Dion Gallapeni dhe Mërgim Vojvoda. Ndërkaq, kontrolli i mesfushës i është besuar dyshes energjike të përbërë nga Leon Abdullahu dhe Veldin Hoxha. Pjesa e sulmit pritet të udhëhiqet nga yjet e repartit ofensiv, ku nga minuta e parë do të rreshtohen Edon Zhegrova, Milot Rashica dhe sulmuesi kryesor Vedat Muriqi.