Tragjedi në Mallakastër: 76-vjeçari humbet jetën në përpjekje e sipër për të frenuar flakët në ullishten e tij

Një ngjarje e rëndë ka tronditur pasditen e sotme fshatin Greshicë të bashkisë së Mallakastrës, ku një 76-vjeçar ka ndërruar jetë pasi u përfshi nga flakët gjithëpërfshirëse ndërsa po tentonte të vinte nën kontroll një zjarr në pronën e tij. Viktima, e cila është identifikuar si Nazif Cenaj, dyshohet se kishte ndezur fillimisht një zjarr për pastrimin e mbeturinave në tokën e tij. Megjithatë, situata ka dalë jashtë kontrollit dhe, gjatë përpjekjeve të dëshpëruara për të shuar vatrën e zjarrit që kishte kapluar një sipërfaqe me ullinj, i moshuari nuk ka mundur dot të largohet në kohë. Kjo është tragjedia e parë fatale e shënuar si pasojë e flakëve në këtë rajon gjatë kësaj periudhe. Menjëherë pas marrjes së njoftimit, strukturat vendore të policisë dhe efektivët e shërbimit zjarrfikës kanë zbarkuar në terren për menaxhimin e situatës. Në lidhje ngjarjen, blutë e qarkut kanë dhënë detajet e para zyrtare: “Rreth orës 12:00, në fshatin Greshicë, Mallakastër, shtetasi N. C., 76 vjeç, dyshohet se ka ndezur zjarr në tokën e tij, për të djegur mbeturinat. Më pas, në përpjekje për të shuar flakët, ky shtetas ka humbur jetën”. Aktualisht, grupi i posaçëm hetimor po vijon punën intensive në vendin e ngjarjes për të zbardhur plotësisht dinamikën dhe rrethanat në të cilat ndodhi ky fatalitet.