Tragjedia në Itali: Detaje të reja nga jetesa dhe orët e fundit të 36-vjeçarit shqiptar që u vra nga pronari i shtëpisë

Opinioni publik në Itali vazhdon të jetë i tronditur pas ngjarjes së rëndë të shënuar gjatë natës mes 19 dhe 20 shtatorit në Baldissero d'Alba. Në këtë ngjarje, Roberto Mollo qëlloi me breshëri armësh ndaj një grupi personash që kishin hyrë në banesën e tij, duke lënë të vdekur 36-vjeçarin shqiptar Gjovalin Lazri pasi zbrazoi pothuajse gjithë karikatorin. Ndërkohë që autoritetet italiane po vijojnë hetimet intensive për të zbardhur plotësisht dinamikën e saktë të krimit, janë zbuluar elemente të reja lidhur me të shkuarën dhe lëvizjet e viktimës në orët para se të ndodhte fatkeqësia. Bazuar në pistat paraprake të hetuesve, ekziston mundësia që Gjovalin Lazri të mos jetë qëlluar në afërsi të shtëpisë ku ishte futur grupi, por në çastin kur po largohej së bashku me bashkëpunonjësit e tij, rreth 30 deri në 40 metra larg pronës së sulmuar. Për këtë arsye, autoritetet gjyqësore dhe policore po u kushtojnë rëndësi maksimale rezultateve të autopsisë dhe ekspertizës balistike, të cilat do të jenë përcaktuese për zbardhjen e së vërtetës. Gjovalin Lazri, 36 vjeç, ishte i vendosur prej vitesh në qytetin e Torinos. Ai banonte në lagjen Barriera di Milano, në zonën veriore të qytetit, së bashku me partneren e jetës dhe djalin e tyre të mitur. Prej afro dy vitesh, çifti drejtonte një lokal në Corso Taranto, ndërsa partnerja e tij ushtronte gjithashtu aktivitetin në një studio tatuazhesh. Për rrethin e tyre shoqëror, ata bënin një jetë të qetë, të ndarë mes angazhimeve familjare, rritjes së djalit dhe punës së përditshme.