Arsenali drejt marrëveshjes së re me Declan Rice, paqartësi për tre yjet e tjerë

Klubi londinez i Arsenalit po shënon hapa para në bisedimet për vazhdimësinë e Declan Rice, ndërsa brenda radhëve të “Topçinjve” mbretëron një klimë optimizmi për mbylljen e suksesshme të marrëveshjes me mesfushorin anglez në një të ardhme të afërt. Megjithatë, palët ende nuk kanë arritur një akord përfundimtar. Rice, i cili u transferua te skuadra nga West Hami gjatë vitit 2023, është i lidhur me një kontratë aktuale deri në vitin 2028. Megjithatë, drejtuesit e klubit synojnë ta sigurojnë atë për një afat edhe më të gjatë, duke e vlerësuar si një nga shtyllat kryesore në skemat e trajnerit Mikel Arteta. Në krahun tjetër, panorama paraqitet më e paqartë sa i përket tre lojtarëve të tjerë kyç të organikës. Martin Odegaard, Kai Havertz dhe David Raya kanë gjithashtu marrëveshje valide deri në vitin 2028, mirëpo bisedimet për zgjatjen e tyre nuk kanë shënuar zhvillime domethënëse deri më tani. Edhe pse diskutimet me këtë treshe ishin planifikuar të intensifikoheshin muaj më parë, mungesa e një përparimi të dukshëm nuk tregon domosdoshmërisht për çarje apo pakënaqësi mes palëve, pasi bisedimet e kësaj natyre shpesh kërkojnë kohë për shkak të faktorëve të ndryshëm. Pasi ka siguruar së fundmi vazhdimësinë e disa prej futbollistëve kryesorë, prioritet i radhës për Arsenalin mbetet zyrtarizimi i marrëveshjes me Rice, duke e konsideruar atë si gur themeli në projektin afatgjatë të drejtuar nga Arteta.