Mbyllet çështja: Prokuroria Speciale pushon hetimet ndaj ish-ministrit Liburn Aliu

Ish-ministri i Infrastrukturës, Liburn Aliu, ka bërë të ditur përmes një njoftimi se Prokuroria Speciale ka marrë vendim për të mbyllur hetimet ndaj tij, proces ky që kishte nisur afro dy vite më parë. Sipas Aliut, vendimi për pushimin e këtyre hetimeve është zyrtarizuar më 11 shtator, ndërsa atij i është komunikuar zyrtarisht më 2 tetor. Ai ka sqaruar se gjatë kësaj kohe, autoritetet kanë shqyrtuar me kujdes jo vetëm angazhimin dhe vendimet e tij gjatë kohës sa ka drejtuar ministrinë, por kanë kryer edhe verifikime të thella mbi pasurinë e tij, të afërmve të tij, si dhe mbi të hyrat financiare ndër vite. Në deklaratën e tij, Aliu është shprehur se gjatë kësaj periudhe është përballur me fushata të ndryshme dezinformimi, të cilat ai i ka cilësuar si “shpifje dhe ofendime”, duke shtuar se ka preferuar të ruajë heshtjen dhe t'i hapë rrugë e t'i japë besim procesit të plotë hetimor për të zbardhur të vërtetën.