Testi miqësor ndaj Ukrainës, Bushi: Synojmë vetëm triumfin dhe karakterin në fushë

Përfaqësuesja U-21 e Shqipërisë do të zbresë nesër në fushë për të zhvilluar ndeshjen miqësore kundër Ukrainës. Takimi do të luhet në stadiumin “Szentmarjay Tibor Városi Stadion” në qytetin e Egerit në Hungari, me fillim nga ora 15:30. Në prag të kësaj përballjeje, trajneri i kuqezinjve të rinj, Alban Bushi, ka vlerësuar maksimalisht procesin përgatitor dhe ka nënvizuar peshën që ky duel ka për grupin. Tekniku ka bërë të ditur se skuadra ka pasur hapësirën e nevojshme kohore për t'u bërë gati. “Kemi pasur mjaftueshëm kohë për t’u përgatitur për këtë ndeshje shumë të rëndësishme dhe të fortë për ne, pothuajse një javë. Kemi bërë të gjitha ato se çfarë ne kërkonim”, u shpreh Bushi. Kreu i pankinës kuqezi u ndal te përbërja e grupit, duke veçuar dy nga talentet e reja, Kullën dhe Huqin, të cilët sipas tij kanë lënë mbresa mjaft pozitive gjatë seancave stërvitore. “Kishim shumë lojtarë të rinj këtë radhë dhe moshë të vogël. Dy prej tyre dua t’i cilësoj si e ardhmja e futbollit shqiptar, siç është Kulla dhe Huqi, sepse më kanë surprizuar në stërvitje. Shpresoj që edhe nesër të kenë minutat e tyre. Patjetër që njëri do të jetë në formacion, kurse tjetri mund të ketë minuta më vonë”, tha ai. Pavarësisht fitores së arritur në të kaluarën ndaj këtij kundërshtari, trajneri Alban Bushi parashikon një ndeshje të vështirë, duke shtuar se kushtet dhe rrethanat janë krejtësisht të ndryshme, ndaj dhe ekipi duhet të shfaqë personalitet. “Ukrainë është një ekip i fortë. E kemi thënë edhe më parë. Kemi luajtur me ata dhe i kemi mundur këtu, por nesër është një ndeshje krejt tjetër. Jemi në rrethana komplet të tjera”, theksoi Bushi. Sa i përket synimit kryesor, trajneri i Kombëtares U-21 ka qenë i prerë se Shqipëria do të kërkojë vetëm suksesin në këtë duel. “Përveç se fitores çdo rezultat tjetër nuk do na bëjë të ndihemi mirë. Ekipi ynë futet gjithmonë për fitore. Nuk diskutohet, e thashë edhe pak më parë që çdo rezultat tjetër nuk do na bëjë të ndihemi mirë, si barazimi, po ashtu edhe humbja nuk diskutohet fare. Ne kemi një ekip shumë të fortë, kompakt dhe solid. Do e tregojmë nesër që jemi një ekip me karakter dhe që nuk dorëzohemi kurrë. Këtë e kemi bërë në të gjitha ndeshjet që kemi luajtur, por nesër do ta shfaqim akoma më mirë në fushë dhe duam vetëm fitore. Lojtarëve i është transmetuar dhe i kërkohet vetëm fitorja, por gjithmonë të jemi skuadër në ekuilibër dhe gjithmonë ato gjëra që do bëjmë, t’i bëjmë të sakta dhe të bukura. Duam të performojmë mirë, por patjetër rezultati është një pjesë e jona shumë e rëndësishme që duam ta marrim nesër”, përfundoi Alban Bushi.