Argjentina shkëlqen pa Messin, triumfon me shtatë gola ndaj Burkina Fasos

Përfaqësuesja e Argjentinës ka regjistruar një fitore të thellë prej 7-0 ndaj përzgjedhjes U-23 të Burkina Fasos, në një duel ku trajneri Lionel Scaloni preferoi të mos rrezikonte yllin e skuadrës, Lionel Messi, i cili e ka të rezervuar ndeshjen e tij të fundit me fanellën kombëtare ndaj Beninit, e cila do të zhvillohet në orët e vona të 6 dhe 7 tetorit. Kombëtarja afrikane zbriti në fushë në kushte tejet të vështira dhe me një formacion të përbërë kryesisht nga lojtarë të grupmoshës U-23. Pjesa më e madhe e grupit kryesor kishte bojkotuar grumbullimin për shkak të ngërçeve logjistike dhe pakënaqësive rreth pagave të prapambetura, duke e lënë ekipin vetëm me një futbollist të ekipit të parë. Për të shmangur dështimin total të këtij takimi prestigjior, institucioni drejtues i futbollit në Burkina Faso ndërhyri në minutën e fundit, duke anuluar një miqësore tjetër që e kishin të programuar kundër Malit dhe bindur përzgjedhjen e të rinjve që të udhëtonte drejt Amerikës Latine. Pavarësisht se delegacioni mysafir shkeli në Buenos Aires vetëm pak orë para fillimit të sfidës, argjentinasit nuk patën aspak mëshirë në fushën e blertë. Festivalin e golave e udhëhoqën Lautaro Martínez, Nico Paz dhe Mastantuono, ndërsa rrjeta u tundën edhe nga Prestianni, Julián Álvarez e Simeone, të ndihmuar gjithashtu edhe nga një autogol i shënuar nga Diallo.