Kriza për kreun e shtetit, Arianit Koci: Mbeten vetëm dy ditë dhe ende mungon një kandidaturë

Avokati i njohur Arianit Koci ka ngritur shqetësimet e tij lidhur me dinamikën e zgjedhjes së presidentit të ri të Kosovës, duke rikujtuar se data e fundit e këtij afati kushtetues është 6 tetori. Në reagimin e tij, Koci ka shprehur pakënaqësinë e thellë për faktin se ende nuk është bërë publik asnjë emër konkret për këtë post kyç, i cili sipas tij duhet të shërbejë si një figurë unifikuese dhe përfaqësuese për të gjithë qytetarët e vendit. "Edhe dy ditë, më 6 tetor, mbaron afati me e zgjedhë presidentin, e ne ende nuk kemi emër! Presidenti ka me na përfaqësu të gjithëve", ka deklaruar ai. Sipas avokatit, një proces kaq i rëndësishëm shtetëror është dashur të planifikohej kohë më parë, duke bërë të ditur qartë se kush do të propozohet dhe mbi çfarë kriteresh. Ai ka paralajmëruar se tashmë është tepër vonë për të zhvilluar një proces serioz dhe se zgjidhja e pranueshme nuk mund të vijë përmes emrave të papritur. "Është dashtë me e ditë me kohë kush propozohet dhe pse. Tashmë është vonë për një proces serioz, e zgjidhja nuk është me na nxjerrë një president prej zarfit. Shteti nuk udhëhiqet me befasi. Turp për ata që e sollën punën deri këtu!", ka përfunduar Koci.