Ramadani: LDK dhe PDK ranë në grackën e Kurtit, vetëm Aleanca e kuptoi drejt situatën që në nisje

Deputeti i Aleancës, Burim Ramadani, ka dalë me një reagim të ashpër lidhur me dinamikat e fundit politike dhe tryezat e diskutimit mes liderëve institucionalë e partiakë për çështjen e zgjedhjes së presidentit. Sipas tij, skenari i ndërtuar ka qenë pjesë e një manovre dhe manipulimi, ku fillimisht ka rënë Lidhja Demokratike e Kosovës, e më pas edhe Partia Demokratike e Kosovës. “Manovrim i tij. Manipulim i tij. Gabim kanë bërë të dyja. Aleanca qëndroi drejt!”, ka shkruar Ramadani në reagimin e tij publik. Më tej, ai ka vënë në shënjestër takimet e liderëve, duke ngritur dyshime të forta se ato janë shfrytëzuar vetëm për qëllime propagandistike e jo për të gjetur një konsensus të qëndrueshëm. “Është gabim të besohet se Kurti ka vullnet të mirë. Takimet nuk kanë qenë asnjëherë për marrëveshje. Takimet kanë qenë për blerje kohe dhe për fotografi”, ka pohuar ndër të tjera deputeti. Në përmbyllje të qëndrimit të tij, Ramadani ka theksuar se subjekti i tij politik ka qenë i vetmi që e ka deshifruar saktë strategjinë e kryeministrit, duke ruajtur të njëjtën linjë veprimi nga hapat e parë e deri në fund. “Aleanca mbeti e vetmja që e lexoi lojën e Kurtit. Që nga fillimi e deri në fund, Aleanca nuk u lëkund fare dhe e tha veç të vërtetën”, ka përfunduar ai.