Flakët përfshijnë fshatin Torinë në Lipjan: Dëme materiale të mëdha dhe mijëra balota sanë të shkrumbuara

Një zjarr i përmasave të gjera ka shkaktuar dëme materiale të konsiderueshme në fshatin Torinë të komunës së Lipjanit, duke alarmuar banorët dhe autoritetet lokale. Sipas informacioneve zyrtare nga Policia e Kosovës, flakët janë përhapur shpejt, duke kapluar një objekt, tri stalla kafshësh, dy makineri korrëse, si dhe rreth 4 mijë duaj sanë. Prona e dëmtuar i përket tri familjeve të ndryshme të kësaj zone. Menjëherë pas marrjes së njoftimit, në vendngjarje kanë mbërritur ekipet e zjarrfikësve dhe njësitet policore, të cilët kanë lokalizuar situatën. Ndërkohë, me urdhër të prokurorit të shtetit, rasti është iniciuar si vepër penale dhe hetimet për zbardhjen e shkaqeve të këtij incidenti janë në ecje e sipër.