Tentoi të hynte me armë në një klub në Prishtinë, ndërhyn sigurimi dhe arrestohet i dyshuari

Një incident i rëndë ka ndodhur në orët e para të mëngjesit në kryeqytet, ku një person është vënë në pranga pasi dyshohet se ka kërcënuar punonjësit e sigurimit të një lokali nate me armë zjarru. Sipas informacioneve zyrtare nga Policia e Kosovës, ngjarja është regjistruar më 3 tetor, rreth orës 01:00 pas mesnate. I dyshuari është ndaluar në hyrje të klubit nga stafi i sigurimit pasi i është refuzuar hyrja, situatë kjo që ka tensionuar menjëherë atmosferën. Në shenjë revolte, ai ka nxjerrë armën dhe e ka drejtuar nga punonjësit e sigurimit. Megjithatë, falë reagimit të shpejtë të një dëshmitari në vendngjarje, atij i është hequr arma nga dora, e cila më pas është vënë nën kontroll të plotë nga personeli i sigurimit. Autoritetet policore kanë dalë menjëherë në vendin e ngjarjes, ku kanë konfiskuar armën e zjarrit si provë materiale. Ndërkohë, pas konsultimit me prokurorin kujdestar, ndaj të dyshuarit është caktuar masa e ndalimit policor dhe ai është dërguar në mbajtje për veprime të mëtejshme hetimore.