Ndërhyrja e ashpër ndaj futbollistit shqiptar ndëshkohet me karton të kuq në Ligën e Kombeve

Mbrojtësi i kombëtares së Skocisë dhe i Dinamos së Zagrebit, Scott McKenna (29), është ndëshkuar me karton të kuq në takimin e vlefshëm për xhiron e tretë të Ligës së Kombeve kundër Maqedonisë së Veriut. Futbollisti skocez u përjashtua nga loja drejtpërdrejt në minutën e 83-të, pas një ndërhyrjeje tejet të rrezikshme dhe të pamatur ndaj Agon Elezit, ish-lojtarit të skuadrave kroate Varazhdin dhe Gorica. Pas duelit të ashpër të skocezit ndaj mesfushorit të Maqedonisë së Veriut, i cili aktualisht luan për Sarajevën, gjyqtari kryesor ndërhyri pa u menduar dy herë dhe e ndëshkoi atë me karton të kuq, duke e detyruar të lërë fushën e blertë. Si pasojë e kësaj ndërhyrjeje, Elezi mbeti i shtrirë në tokë për disa çaste. Pavarësisht se mbetën me një lojtar më pak në fushë në minutat e fundit, skocezët arritën të menaxhojnë situatën, duke ruajtur epërsinë prej 2:0 deri në vërshëllimën përfundimtare të gjyqtarit.