Gashi: Lidhja Demokratike e Kosovës nuk thyhet nga presionet dhe as nuk pranon shantazhe

Deputeti i Lidhjes Demokratike të Kosovës, Arben Gashi, ka ngritur shqetësime serioze lidhur me luhatjet e qëndrimeve politike të partisë së tij gjatë periudhës së fundit njëvjeçare e gjysmë, duke theksuar se kjo paqëndrueshmëri e ka bërë të vështirë për elektoratin që të kuptojë qartë misionin e LDK-së. Përmes një reagimi publik, Gashi ka theksuar se kjo forcë politike nuk duhet t'i nënshtrohet asnjë lloj forme shantazhi, duke bërë thirrje urgjente për një kthesë drejt parimeve themeltare, programit politik dhe vizionit afatgjatë. “LDK-ja që i duhet Kosovës nuk e presim. E ndërtojmë. Dhe e ndërtojmë bashkë. Tash”, ka shkruar ndër të tjera Gashi në profilin e tij. Duke analizuar situatën, ai ka theksuar se elektorati nuk ka asnjë faj që e ka të pamundur të orientohet në mes të kthesave të shpeshta politike, duke përmendur kalimin nga refuzimi i dialogut me Kurtin, tek kërkesa për zgjedhje, pastaj te synimi për bashkëqeverisje, e deri te propozimet aktuale për çështjen e presidentit. Gashi ka vënë njoftimin në faktin se vendi tashmë ka kaluar nëpër tri cikle zgjedhore dhe po rrezikon të katërtat, duke mbetur pa qeveri dhe pa institucione funksionale. Ai gjithashtu ka kritikuar përpjekjet e qarqeve pranë Lëvizjes Vetëvendosje për të gjetur gjashtë deputetë të LDK-së si fajtorë për dështimin e tyre në misionin për të nënshtruar LDK-në dhe vetë shtetin e Kosovës. “Ku janë parimet? Ku është konsistenca? Ku është drejtimi? Ku është ideali? Jo të nderum. LDK-ja nuk nënshtrohet dhe nuk shantazhohet. Kot e keni”, ka shtuar ai me nota të ashpra kritike. Në vlerësimin e tij, Kosovës i duhet një LDK autentike, e cila posedon politika të qarta, programe konkrete, aleanca të shëndosha dhe një vizion të qartë për zhvillimin ekonomik e shoqëror të vendit — një parti që bashkëpunon gjerësisht, por pa rrezikuar identitetin dhe parimet e saj themelore. Në fund, Gashi ka bërë thirrje që kjo të jetë pika e kthesës për t'u rikthyer te baza, te vlerat dhe te qytetarët, me qëllim ndërtimin e një LDK-je që dallohet për qëndrime të palëkundura, vendime të matura dhe veprime plotësisht të besueshme.