Avioni mjekësor zhduket në oqean gjatë fluturimit drejt SHBA-së, nisin operacionet masive të kërkimit

Një aeroplan mjekësor, në bordin e të cilit ndodheshin gjashtë persona, ka humbur kontaktet radarike pranë ishullit Nantucket, ndërsa po kryente një fluturim nga Bermuda në drejtim të Bostonit. Ngjarja ka ndodhur gjatë orëve të para të së shtunës, konfirmim ky i dhënë zyrtarisht nga Roja Bregdetare e Shteteve të Bashkuara dhe Administrata Federale e Aviacionit (FAA). Sipas autoriteteve të aviacionit, bëhet fjalë për një mjet fluturues të tipit Gulfstream G-100, me të cilin u shkëput çdo lidhje komunikimi, duke detyruar institucionet përgjegjëse të lëshojnë menjëherë një alarm për kërkim dhe shpëtim. Operacioni intensiv për gjetjen e avionit po përqendrohet në ujërat detare që rrethojnë Nantucket, siç onfermohet nga distrikti verilindor i Rojës Bregdetare amerikane. Për këtë qëllim, në terren janë angazhuar njëkohësisht mjete të specializuara ajrore dhe anije detare. Të dhënat e siguruara nga numri i regjistrimit, të publikuara nga vetë Roja Bregdetare, tregojnë se aeroplani i përket kompanisë 'Latitude Air Ambulance'. Referuar platformës së gjurmimit të fluturimeve 'FlightAware', mjeti ishte nisur rreth orës 23:40 të ditës së premte, ndërsa sinjali dhe lidhja me të u këputën pas rreth një ore e dyzet e pesë minuta fluturim. Parashikohej që udhëtimi të përfundonte me uljen e suksesshme në Aeroportin Ndërkombëtar Logan të Bostonit.