Haziri sqaron pozicionin e LDK-së: Kemi 18 deputetë të gatshëm për Presidentin, çelësi është konsensusi

Nënkryetari i Lidhjes Demokratike të Kosovës, Lutfi Haziri, ka theksuar se fokusi kryesor sa i përket zgjedhjes së presidentit të ri nuk duhet të jetë te emri i përveçëm, por te arritja e një marrëveshjeje të gjerë politike. I pyetur nëse subjekti i tij do ta mbështeste Bekim Sejdiun në kuadër të një pakti të mundshëm me Partinë Demokratike të Kosovës dhe forcat e tjera parlamentare, Haziri u shpreh se parësore mbetet dakordimi që garanton unitet. Sipas tij, çështja nuk ka të bëjë aspak me integritetin apo kredibilitetin e kandidatit të propozuar, por me mungesën e një konsensusi paraprak që do t'i siguronte kreut të ardhshëm të shtetit mbështetjen e nevojshme për të qenë faktor unifikues i popullit. "Praktikisht, nuk ka të bëjë me emrin e përveçëm, nuk ka të bëjë kurrgjë me Bekimin, si i propozuar dhe si kandidat me kredibilitet. Ka të bëjë me mosarritjen e një konsensusi i cili ia siguron unitetin e votimit, në mënyrë që ai me siguru unitetin e popullit në të ardhmen", ka deklaruar Haziri gjatë prononcimit të tij. Lidhur me qëndrimin e deputetëve të LDK-së në një skenar të mundshëm marrëveshjeje, nënkryetari i partisë bëri thirrje që të mos ketë ndarje brenda grupit parlamentar, duke bërë të mejen se forca e tyre politike buron nga uniteti në lirinë e mendimit. "Mos na ndani, ne jemi 18. Ne e kemi një dallim, një rast, po LDK-ja e ka një vlerë të demokracisë, ne bashkohemi në dallimet tona. Kështu që ajo është vetëm një episod që ka ndodhur në një rast kur janë dalluar…", përfundoi Haziri.