Muriqi ironizon austriakët për fushën e “Fadil Vokrri”-t: Po kërkojnë alibi para ndeshjes

Kapiteni i Përfaqësueses, Vedat Muriqi, ka dhënë një përgjigje të prerë ndaj ankesave të ardhura nga pala austriake lidhur me gjendjen e fushës në stadiumin “Fadil Vokrri”. Gjatë prononcimit të tij, sulmuesi shtoi se në këtë stadium kanë zhvilluar ndeshje skuadra të njohura evropiane si Suedia, Zvicra apo Irlanda, të cilat nuk kanë ngritur shqetësime të tilla, duke lënë të kuptohet se pretendimet e austriakëve janë të pabazuara. “Terreni është absolutisht i njëjtë për të dyja skuadrat. Këtu kanë matur forcat kombëtare të mëdha, përfshirë Suedinë, Zvicrën dhe Irlandën, dhe askush prej tyre nuk është ankuar ndonjëherë”, u shpreh Muriqi. Më tej, ai nuk ka ngurruar të hedhë dyshime mbi motivet e këtyre reagimeve, duke i cilësuar ato si një përpjekje të hershme për të gjetur një justifikim në rast të një dështimi të mundshëm në fushën e blertë. “Kjo situatë më duket më tepër si një mënyrë e austriakëve për të përgatitur një alibi për rezultatin e ndeshjes. Shpresoj shumë që në fund të ndodhë pikërisht kështu”, përfundoi kapiteni.