Tragjedi nga moti i keq në Spanjë: 102-vjeçarja humb jetën prej përmbytjeve, dhjetëra të shpëtuar

Një valë e fuqishme përmbytjesh të menjëhershme ka goditur qytetin spanjoll Madrigueras, në provincën e Albacete, duke lënë pas një viktimë dhe dhjetëra qytetarë të shpëtuar. Sipas autoriteteve vendase, tragjedia ka prekur një grua 102-vjeçare, e cila ka ndërruar jetë pasi banesa e saj u pushtua nga uji. Sipas të dhënave nga qeveria rajonale, në këtë zonë u regjistruan reshje intensive shiut që arritën në 142 litra për metër katror. Përballë kësaj situate kritike, institucionet kompetente u vunë menjëherë në lëvizje, duke vënë në zbatim Planin e Rrezikut të Pafavorshëm Meteorologjik (METEOCAM) në nivelin operacional 1 dhe duke nisur një operacion masiv emergjence. Trupi i pajetë i viktimës u lokalizua brenda shtëpisë së saj, ku niveli i ujit kishte kapur lartësinë e rreth një metri. Gjatë orëve të pasdites dhe në vijim të mbrëmjes, njësitë e shpëtimit ndërhynë në rreth 90 raste, kryesisht për të nxjerrë në siguri banorët që kishin mbetur të bllokuar në banesat e tyre nga vërshimi i ujërave. Autoritetet bënë të ditur se qendrat e thirrjeve të emergjencës u tejmbushën me telefonata nga qytetarë të alarmuar, të cilët kërkonin ndihmë të menjëhershme dhe udhëzime se si të mbroheshin nga rreziku. Linjat e komunikimit mbetën të mbingarkuara për shkak të panikut dhe situatës kritike në terren. Kryeministri i Spanjës, Pedro Sánchez, përmes një mesazhi publik, dërgoi ngushëllimet më të sinqerta për familjen e viktimës dhe shprehu mbështetjen e plotë për të gjithë banorët e zonave të prekura. Ndërkohë, presidenti i rajonit të Castilla-La Mancha, Emiliano García-Page, ka zbritur vetë në terren në Madrigueras, ndërsa Garda Civile vijon pa ndërprerë operacionet për pastrimin e zonës dhe menaxhimin e dëmeve të lëna pas nga kjo fatkeqësi natyrore.