Skandali i videove intime/ Reagon Kreshnik Spahiu: Eli Farës i mungon respekti për veten, u bë bashkëpunëtore

Këngëtarja e njohur Eli Fara ka thyer heshtjen ditën e sotme, duke iu përgjigjur publikisht skandalit të përhapjes së pamjeve të saj intime në hapësirat digjitale. Përmes një deklarate të shpërndarë në llogarinë e saj zyrtare në “Instagram”, artistja ka theksuar se nuk ka pse të ndiejë turp, duke ia faturuar këtë ndjenjë autorëve që mundësuan shpërndarjen e materialeve. Në mesazhin e saj, Fara vlerëson se asnjë femër nuk duhet të përballet me një formë të tillë poshtërimi. Ajo e përmbyll reagimin e saj duke siguruar ndjekësit se do t'i duhet pak kohë për t'u rimëkëmbur, por do të vijojë rrugëtimin e saj me kokën lart dhe me dinjitet të plotë. Megjithatë, kjo deklaratë ka sjellë një reagim të ashpër nga analisti dhe figura publike Kreshnik Spahiu. Nëpërmjet një shënimi në rrjetet sociale, Spahiu pohon se këngëtarja ka plotësisht të drejtë në 99 për qind të rasteve kur bëhet fjalë për të drejtën e saj për të mbrojtur lirinë personale. Nga ana tjetër, Spahiu e vë theksin tek 1 përqindëshi i gabuar sipas tij, duke e cilësuar si të papranueshme dëshminë e dhënë nga Fara në organet e rendit, ku ajo mbrojti alibinë e personit që realizoi xhirimet dhe, sipas tij, i dëmtoi imazhin e ndërtuar ndër dekada. “Eli Fara ka 99% të drejtë që të gjithë duhet të respektojnë lirinë e saj. 1% ishte e tmerrshme mbrojtja që ajo bëri në polici të alibisë së atij që e filmoi dhe i shkatërroi fytyrën e ndërtuar për 60 vjet. Duke e mbrojtur alibinë, u bë bashkëpunëtore. Kaq. Kur humb respektin për veten, mos ia kërko popullit. Deri dje isha me 15 gra viktima. Sot jam me 14. Uroj që të tjerat të tregojnë në jetë se duan veten si gra më shumë se tutorin dhe dhunuesin e tyre”, shkruan Kreshnik Spahiu në profilin e tij.