Ylli i muzikës del hapur pro Inteligjencës Artificiale: Jam e fiksuar pas saj!

Këngëtarja e njohur Kelly Clarkson ka surprizuar publikun me qëndrimin e saj pro teknologjisë, duke e cilësuar Inteligjencën Artificiale si një instrument fantastik për të stimuluar kreativitetin në industri. Megjithatë, ajo ka vënë një vijë të kuqe, duke theksuar se shpirti njerëzor në art nuk mund dhe nuk duhet të tjetërsohet. Gjatë një interviste në podkastin e njohur “Las Culturistas”, artistja zbuloi hapur entuziazmin e saj për risitë që sjell ky sektor. “Unë e dua Inteligjencën Artificiale. Ka gjëra të mahnitshme që mund të bëhen me të, me të cilat jam e fiksuar. Jam shumë e interesuar për të nga një këndvështrim artistik. Argëtohem me të si të gjithë të tjerët”, u shpreh ajo gjatë bisedës. Pavarësisht këtij adhurimi, fituesja e çmimeve prestigjioze ka bërë një ndarje të qartë mes përdorimit të IA-së si ndihmëse në procesin krijues dhe shfaqjes së artistëve të gjeneruar tërësisht nga algoritmet. Sipas saj, shfaqja e zërave sintetikë në garat direkte me njerëzit përbën një shqetësim real. “Kur shihni artistë të krijuar me IA që konkurrojnë me njerëzit në top lista, atëherë kam një problem. Mendoj se duhet të ketë një top të veçantë”, tha Clarkson, duke ngritur shqetësimin për drejtësinë në tregun muzikor. Për ta ilustruar më qartë këtë dilemë, ajo solli një krahasim sportiv, duke e përshkruar një skenar të tillë si një garë atletike ku njerëzit e zakonshëm detyrohen të sfidojnë robotë të pajisur me avantazhe të padrejta teknologjike.