Liga e Kombeve ndizet sot: Kroaci-Angli dhe Spanja në mision për kreun

Vëmendja e futbollit europian zhvendoset te Liga e Kombeve, ku mbrëmja e sotme sjell dy superpërballje vendimtare në garën për kreun e grupit. Një nga duelet më magnetike të ditës do të luhet në Kroaci, ku vendasit do të presin Anglinë në një ndeshje ku fitorja është jetike për ambiciet e të dyja ekipeve. Kombëtarja kroate kërkon me çdo kusht një kthesë pozitive, pas disfatës së rëndë 4-1 që pësoi përballë Spanjës, ndërkohë që më parë kishte regjistruar një triumf ndaj Republikës Çeke. Për sa i përket organikës, sytë e tifozëve kroatë do të jenë drejtuar te Dion Beljo, i cili vjen në këtë takim pas një eforme fantastike, me pesë gola të shënuar në katër sfidat e fundit mes klubit dhe kombëtares. Në krahun tjetër, “Tre Luanët” udhëtojnë drejt kësaj sfide të mbështetur te fitorja 2-0 ndaj çekëve, rezultat që shërbeu për të lënë pas humbjen 3-2 në ndeshjen hapëse kundër Spanjës. Përfaqësuesja angleze synon të vazhdojë ndjekjen e spanjollëve në krye të renditjes, duke u mbështetur te një statistikë mbresëlënëse prej tetë fitoresh radhazi në udhëtim gjatë ndeshjeve zyrtare. Gjithashtu, Anglia ka anën e saj edhe traditën e përballjeve direkte, pasi ka fituar tre duelet e fundit kundër Kroacisë, përfshirë suksesin 4-2 në Botërorin e kaluar. Një nga rreziqet kryesore në fushë për anglezët pritet të jetë Anthony Gordon, autor i golave në tri paraqitjet e tij të fundit me fanellën e kombëtares. Në sfidën tjetër të mbrëmjes, Spanja do të kërkojë të ruajë ecurinë e saj perfekte dhe vendin e parë në grup. Kampionët në fuqi kanë dominuar dy takimet e para ndaj Anglisë e Kroacisë, dhe zbarkojnë në fushë me një seri fenomenale prej 40 ndeshjesh pa njohur humbje, e cila përfshin 30 fitore dhe 10 barazime. “La Roja” do të matë forcat me Republikën Çeke, një skuadër që ndodhet në vështirësi pas dy humbjeve radhazi dhe rrezikon seriozisht rënien në Ligën B. Statistikat gjithashtu flasin qartë në favor të spanjollëve, të cilët nuk kanë humbur asnjë nga shtatë përballjet e fundit direkte kundër çekëve, duke numëruar pesë fitore dhe dy barazime. Ndërkohë që talenti Lamine Yamal mbetet një prej armëve kryesore të Spanjës, te Republika Çeke shpresat për një rezultat pozitiv lidhen ngushtë me paraqitjen e Adam Hložek. Kalendari rezervon spektaklin e parë në orën 18:00 me sfidën Kroaci-Angli, ndërsa pak orë më vonë, saktësisht në orën 20:45, do të nisë përballja mes Spanjës dhe Republikës Çeke.