Gjimshiti shpall ambiciet e kuqezinjve: Synojmë kreun e grupit dhe Evropianin e tretë

Kapiteni i Kombëtares shqiptare, Berat Gjimshiti, ka dalë para mediave për të ndarë pritshmëritë rreth atmosferës në skuadër, ambiciet në Ligën e Kombeve dhe risitë taktike që stafi teknik pritet të implementojë në fushën e lojës. Gjatë fjalës së tij, mbrojtësi kuqezi ka vlerësuar maksimalisht ditët e fundit të stërvitjes, duke i dhënë theks të veçantë rikthimit të portierit Etrit Berisha, për të cilin u shpreh se sjell pjekuri dhe mbështetje të vyer për elementët e rinj të grupit. “Besoj që e kam gjetur skuadrën shumë mirë. Kemi pasur pak më shumë kohë. Na nevojiteshin këto ditë për të mësuar dhe ushtruar idetë e trajnerit. Është një frymë shumë pozitive në Kombëtare. Etriti është rikthimer, është lojtar kyç dhe me eksperiencë. E njoh, kam luajtur me të në Itali dhe do t’u japë një dorë të rinjve”, deklaroi Gjimshiti. Ndërkohë, sa i takon kalimit të tij në futbollin e Arabisë Saudite, kapiteni e ka cilësuar këtë lëvizje si një kapërcim cilësor dhe një provë të fortë për karrierën e tij si mbrojtës. “Pse në Arabi? Ndoshta i kam hapur rrugën Asllanit. Ka qenë vendimi im, bashkë me Atalantën. Ndoshta nga jashtë nuk duket kampionat i fortë, sepse nuk e transmetojnë të gjitha televizionet, por është një ligë shumë e vështirë. Ka shumë lojtarë me cilësi që kanë ardhur nga Evropa në tre-katër vitet e fundit. Nuk është aq e thjeshtë sa duket. Sidomos për mbrojtësit, sepse çdo ekip ka një sulmues me emër. Për mua është një sfidë e madhe si mbrojtës”, u shpreh ai. Në lidhje me misionin e Shqipërisë në Ligën e Kombeve, Gjimshiti nuk ka lënë vend për dilema, duke konfirmuar se synimi parësor mbetet kreu i tabelës dhe sigurimi i një biletë historike drejt një tjetër Kampionati Evropian. “Premtimi është se do të japim maksimumin, do të jemi të gjithë bashkë, si në fitore, ashtu edhe në humbje. Duam vendin e parë dhe të kemi mundësinë për të shkuar për herë të tretë në Europian. Ky është synimi dhe kjo është rruga e duhur”, theksoi kapiteni kuqezi. Për çështjet e skemave dhe rreshtimit në fushë nën drejtimin e Maranit, Gjimshiti ka lënë të kuptohet se zgjedhja përfundimtare i takon plotësisht trajnerit, ndërsa theksoi se moduli me tre apo katër mbrojtës nuk përbën ndonjë ndryshim rrënjësor. “Këto vite kam pasur disa trajnerë dhe taktika të ndryshme. Kam folur shumë me trajnerin Maran për taktikat dhe gjëra të tjera. Mendoj se do të vendosë më të mirën për ekipin, që të përshtaten të gjithë lojtarët dhe ajo që na hap rrugën për sukses. Luajmë me tre apo me katër, nuk besoj se ndryshon shumë. Atë e vendos trajneri në fund”, tha Gjimshiti. Në mbyllje të konferencës, mbrojtësi ka evokuar rëndësinë e mentalitetit fitues dhe të qasjes psikologjike në çdo duel, duke shpresuar që grupi të arrijë majat e kërkuara. “Ne kemi pretendime për vendin e parë. Kam parë gjithmonë për maksimumin. Nuk kishim fat me Poloninë për Botërorin, do të ishte një arritje e madhe. Prapë do të shikojmë të përsërisim Europianin. Pse jo për herë të tretë? Mentaliteti ka shumë rëndësi kur zbret në fushë, sepse gjithçka fillon në kokë. Në verë trajneri ka pasur idetë e tij, por nuk kishim shumë kohë”, përfundoi Gjimshiti.