Abelard Tahiri pas lëvizjes së Qeverisë për Specialen: Ushtria Çlirimtare e Kosovës është vlerë që na bashkon të gjithëve

Shefi i Grupit Parlamentar të Partisë Demokratike të Kosovës (PDK), Abelard Tahiri, ka dalë me një reagim zyrtar lidhur me vendimin e fundit të ekzekutivit për të proceduar në Kuvend projektligjin për ndryshimin dhe plotësimin e Ligjit për Dhomat e Specializuara. Nëpërmjet një postimi në rrjetet sociale, Tahiri ka theksuar se trashëgimia e Ushtrisë Çlirimtare të Kosovës duhet të shërbejë si një element unifikues për shoqërinë dhe politikëbërjen, duke lënë mënjanë çdo lloj ndarjeje. "Siç e kam thënë përherë, UÇK-ja duhet të na bashkojë! Prandaj, çdo çështje që lidhet me të, duhet të trajtohet me përgjegjësi, sinqeritet dhe korrektësi maksimale. Pa kalkulime politike. Pa interesa të ngushta. Pa përçarje. Në çështjet që prekin themelet e lirisë sonë, duhet të jemi bashkë", ka deklaruar ndër të tjera zyrtari i lartë i PDK-së.