Kombëtarja U-21 përmbyll stërvitjet në kryeqytet, nesër niset për në Hungari

Përfaqësuesja e Shqipërisë U-21 ka përmbyllur fazën përgatitore në Tiranë dhe nesër do të niset drejt qytetit Eger në Hungari. Aty ku më 5 tetor do të zhvillojë një ndeshje miqësore kundër Ukrainës, e cila do të luhet në stadiumin “Szentmarjay Tibor Városi Stadion”, duke nisur nga ora 15:30. Seancat stërvitjene të zhvilluara në ambientet e “Shtëpisë së Futbollit” kanë ecur sipas planit dhe skuadra paraqitet në formë optimale fizike. Lojtarët kanë treguar përqendrim të lartë dhe përkushtim maksimal gjatë gjithë kësaj periudhe në prag të këtij takimi kontrolli. Për t'i dhënë edhe më shumë mundësi grupit para kësaj sfide me ukrainasit, trajneri Alban Bushi ka vendosur të ftojë në radhët e U-21 edhe talentin e Kombëtares U-19, Kris Gecaj. Ky i fundit është integruar tashmë me skuadrën dhe do të jetë plotësisht nën urdhrat e stafit teknik për këtë përballje. Brenda grupit mbizotëron një ambient tejet pozitiv dhe futbollistët shfaqen të motivuar për të dhënë më të thellën e tyre në fushën e blertë gjatë miqësores ndaj Ukrainës. Kujtojmë se dueli mes Ukrainës U-21 dhe Shqipërisë U-21 është programuar për t'u luajtur më 5 tetor, në orën 15:30, në stadiumin “Szentmarjay Tibor Városi Stadion”, ndërsa tifozët do të mund ta ndjekin atë përmes transmetimit direkt në FSHF TV.