I dënuar për rreth 50 vepra penale në Britani, drejtësia angleze bllokon dëbimin e kosovarit

Një 39-vjeçar me origjinë nga Kosova, i cili mban mbi supe një historik prej rreth 50 veprash penale në Mbretërinë e Bashkuar, ka arritur që t'i shpëtojë dëbimit drejt vendlindjes. Vendimi është marrë nga një gjykatës emigracioni, i cili ka konsideruar se ekziston rreziku që ai të përballet me trajtim jo-njerëzor për shkak të origjinës së tij rome dhe mungesës së dokumenteve zyrtare të shtetësisë. Bëhet fjalë për Avdi Alijajn, i cili hyri në mënyrë të paligjshme në territorin britanik në vitin 2002, kur ishte vetëm 14 vjeç, pasi kishte udhëtuar i fshehur në pjesën e pasme të një kamioni. Gjatë dy dekadave të kaluara, sipas të dhënave të gjykatës, ai ka ndërtuar një dosje të rëndë kriminale, e cila përfshin rreth 50 shkelje të ligjit, duke nisur nga vjedhjet, grabitjet, posedimi i lëndëve narkotike të llojit kokainë, e deri te drejtimi i automjeteve në gjendje të dehur apo nën ndikimin e substancave narkotike. Më tej, Alija ishte shpallur fajtor edhe për një ngjarje të rëndë të regjistruar në vitin 2018, e cila lidhej me një pengmarrje. Ai kishte qenë pjesë e një grupi kriminal që kishte rrëmbyer me dhunë një person, duke e futur në automjet nën kërcënimin e thikës dhe duke e dërguar për ta mbajtur të izuluar brenda banesës së vet. Viktima ishte mbajtur peng për rreth katër orë e gjysmë, gjatë të cilave ishte dhunuar dhe kërcënuar se do të plagosej me thikë ose do t'i hidhej ujë i valë nëse nuk paguante një gjobë prej 50 mijë paundësh. Personi në fjalë kishte arritur të shpëtonte vetëm pasi kishte thyer një dritare me xham dopio dhe ishte hedhur nga kati i dytë i ndërtesës. Organet e drejtësisë kishin vlerësuar se Alija pati një rol kyç në këtë krim, duke vënë në dispozicion apartamentin e tij për mbajtjen e pengut. Për këtë vepër penale, ai u dënua me nëntë vite burgim për privim të paligjshëm të lirisë, si dhe me një vit shtesë për plagosje të rëndë trupore. Në muajin mars të vitit 2022, ministrja e Brendshme britanike e asaj kohe, Priti Patel, kishte lëshuar një urdhër zyrtar për dëbimin e tij, duke e cilësuar si një element me rrezikshmëri të lartë për shoqërinë. Megjithatë, Alija e pati kundërshtuar këtë vendim në rrugë gjyqësore, duke u mbështetur te Konventa Evropiane për të Drejtat e Njeriut. Kërkesa e tij ankimore u shqyrtua më 29 shtator nga gjyqtari i emigracionit, Ian Boyes, në një periudhë kur Alija kishte shlyer dënimin me burg dhe ishte liruar me kusht. Gjatë procesit, gjykata mori në konsideratë rrethanat se Alija kishte lindur në Kosovë nga prindër romë, të cilët sipas dëshmive të paraqitura kishin humbur jetën gjatë konfliktit të viteve 1998-1999, ndërsa shtëpia e familjes së tyre ishte shkatërruar plotësisht. Megjithëse gjyqtari pranoi se Alija përbën një rrezik real për komunitetin dhe për këtë arsye nuk mund të gëzonte mbrojtje përmes statusit të azilit sipas Konventës së Gjenevës, ai pranoi një tjetër pretendim ligjor. Konkretisht, gjykata vlerësoi se kthimi i detyrueshëm i tij në Kosovë mund ta ekspozonte atë ndaj një trajtimi që bie ndesh me Nenin 3 të Konventës Evropiane për të Drejtat e Njeriut, nen ky që ndalon në mënyrë kategorike çdo trajtim çnjerëzor ose poshtërues. Në bazë të dëshmive të ekspertëve të pranishëm në seancë, u argumentua se për shkak të mungesës së një statusi të qartë të shtetësisë dhe përkatësisë etnike rome, Alija do të rrezikonte seriozisht të binte pre e diskriminimit, abuzimit dhe shfrytëzimit nëse kthehej në Kosovë. Në vendimin e tij, gjyqtari theksoi se 39-vjeçari gjendet praktikisht në kushtet e një personi pa shtetësi, pasi as hetimet e deritanishme nuk kanë arritur të përcaktojnë përfundimisht statusin e tij zyrtar. Gjithashtu, u peshuan edhe faktorë të tjerë njerëzorë, si fakti se ai kishte jetuar në Britani që nga fëmijëria e hershme, si dhe rreziku i qartë i mbetjes pa strehë dhe i ekspozimit ndaj rreziqeve sociale në rast dëbimi. Në fund të shqyrtimit, apeli i Avdi Alijas u miratua dhe urdhri për dëbimin e tij u pezullua përfundimisht. Ai do të vijojë të qëndrojë në Mbretërinë e Bashkuar, pavarësisht kaluarës së tij të ngarkuar kriminale dhe dënimit për pengmarrje.