Humbje me luftë të fortë për Samadrexhën në sfidën e parë evropiane ndaj ekipit nga Ishujt Faroe

Kampionia e Kosovës në hendboll, Samadrexha, ka nisur aventurën e saj në raundin e dytë të Kupës Evropiane me një ndeshje të zjarrtë të zhvilluar të premten në mbrëmje. Në duelin e luajtur në palestrën sportive "Afrim Bunjaku", skuadra vendase matë forcat me ekipin nga Ishujt Faroe, Neistin. Pas një paraqitjeje me shumë rivalitet dhe luftë të fortë në parket, fitoren përfundimtare e morën mysafiret me rezultatin 28:23. Gjatë fraksionit të parë të lojës, epërsia ishte e ngushtë dhe skuadrat u treguan të barabarta në shumë momente, megjithatë pjesa e parë u mbyll me shifrat 14:11 në favor të vashave nga Ishujt Faroe. Në periodën e dytë, vendaset u mobilizuan dhe arritën të ngushtojnë epërsinë në vetëm një gol diferencë, duke e çuar rezultatin në 22:21. Megjithatë, mungesa e përqendrimit në çastet vendimtare bëri që skuadra mysafire të shkëputet sërish dhe të ruajë avantazhin deri në rënien e sirenës së fundit. Për ekipin e Samadrexhës, paraqitje të mirë patën Arona Krasniqi me gjashtë gola të shënuar, Leonora Rrahmani me pesë, si dhe Jennifer Abreu që kontribuoi me katër të tjerë. Ndërkohë, portierja Anastasia Coguriq regjistroi tetë pritje të rëndësishme gjatë takimit. Sfida e dytë mes dy ekipeve do të zhvillohet këtë të shtunë, me fillim nga ora 18:00, ku Samadrexha do të kërkojë përmbysjen e rezultatit.