Operacion i suksesshëm në Merdare: Parandalohet kontrabanda e mbi 200 vapeve me lëndë narkotike

Dogana e Kosovës, në bashkëpunim të ngushtë me Policinë, ka arritur të korrë një tjetër sukses në luftën kundër paligjshmërisë, duke bllokuar një tentativë për kontrabandë mallrash në pikën kalimit kufitar të Merdares. Intervenimi është realizuar falë analizës së hollësishme të riskut dhe përdorimit të mjeteve dhe pajisjeve të specializuara të kontrollit, të cilat kanë ngritur dyshime për praninë e lëndëve të ndaluara. Në njoftimin zyrtar jepen detajet e operacionit, ku thuhet se gjatë kontrollit është ndaluar një mjet transportues tip furgon me targa të huaja, i cili po transportohej i ngarkuar mbi një karrotrec. Pas një kontrolli të imtësishëm dhe përdorimit të pajisjeve moderne, autoritetet kanë zbuluar mallin e fshehur në hapësirën ndërmjet tapicerisë dhe tavanit të furgonit. Sipas autoriteteve, gjatë këtij aksioni janë sekuestruar në total 204 copë vape (produkte duhani), të cilat dyshohet se përmbajnë kanabis ose substanca të tjera të ngjashme narkotike, ndërsa i gjithë materiali i kundërligjshëm është konfiskuar në përputhje të plotë me legjislacionin në fuqi.