Shkarkimi i Isufaj nga KPK, IKD: Proces i ngutshëm, jo transparent dhe nën hijen e sulmeve të Lëvizjes Vetëvendosje

Instituti i Kosovës për Drejtësi (IKD) ka reaguar ashpër ndaj vendimit të Këshillit Prokurorial të Kosovës (KPK) për largimin e Blerim Isufajt nga pozita e Kryeprokurorit të Prokurorisë Speciale të Republikës së Kosovës (PSRK), duke e cilësuar këtë proces si të ngutshëm, jotransparent dhe të dyshimtë. Në reagimin zyrtar të datës 2 tetor 2026, IKD thekson se çdo emërim apo shkarkim i kësaj natyre duhet të mbështetet mbi parime dhe standarde që i japin besim opinionit publik dhe komunitetit prokurorial se vendimmarrja është plotësisht e pavarur, e drejtë dhe e paanshme. Sipas këtij institucioni, KPK dështoi të arsyetojë nevojën për mbajtjen e një takimi të jashtëzakonshëm dhe të mbyllur për publikun. Organizata vë në dukje se ky vendim merr një prapavijë shqetësuese kur merret parasysh fakti se Blerim Isufaj ka qenë shënjestër e sulmeve të vazhdueshme politike dhe e targetuar si person i padëshirueshëm nga partia në pushtet, Lëvizja Vetëvendosje. Sipas IKD-së, mungesa e arsyeve bindëse në këtë vendimmarrje cenon rëndë besimin e qytetarëve në një drejtësi të pandikuar nga politika. Edhe pse KPK përmes një komunikate përmendi pretendime për keqmenaxhim, mungesë performance dhe jokompetencë të shfaqura përgjatë katër viteve të fundit në PSRK, IKD shtron pyetjen se çfarë masash mbikëqyrëse ka ndërmarrë vetë Këshilli gjatë kësaj kohe. Sipas institutit, problemet e akumuluara ndër vite nuk mund ta arsyetojnë kurrsesi urgjencën e një shkarkimi kaq të shpejtë. Në këtë kontekst, IKD vlerëson se llogaridhënia në sistemin prokurorial është e domosdoshme, por ajo duhet të ndërtohet mbi procedura të qarta, vlerësim objektiv dhe respektim të garancive ligjore. Mënyra se si merret një vendim është parësore për legjitimitetin e tij dhe ruajtjen e besimit institucional. Në fund, IKD rikujton precedentin e shkarkimit të Besim Kelmendit nga pozita e ushtruesit të detyrës së Kryeprokurorit të Shtetit përmes procedurave të ngjashme të shpejta, vendim i cili më vonë u rrëzua si i kundërligjshëm nga Gjykata Supreme, duke kërkuar që KPK të nxjerrë mësime nga e kaluara për të shmangur skenarë të ngjashëm.