Hamza pas takimit me Kurtin: S'ka marrëveshje ende, fillimisht duhet ndryshuar ligji për Specialen e më pas flasim për presidentin

Kryetari i Partisë Demokratike të Kosovës (PDK), Bedri Hamza, ka deklaruar se pas takimit të zhvilluar me kryeministrin Albin Kurti ende nuk është arritur ndonjë dakordim mes palëve, ndërkohë që ka lënë të hapur mundësinë e mbajtjes së takimeve të reja gjatë ditëve në vijim. "Kur të kemi marrëveshje, do t'ju njoftojmë. Ekziston mundësia që të ketë takime të tjera edhe gjatë ditëve në vijim", u shpreh Hamza. Ai bëri të ditur se në fokus të bisedës me shefin e ekzekutivit kanë qenë zhvillimet e fundit rreth procesit gjyqësor në Hagë, vendimi i Dhomave të Specializuara, si dhe domosdoshmëria e miratimit të ndryshimeve ligjore që lidhen me këtë gjykatë. Temë e diskutimit ka qenë gjithashtu çështja e zgjedhjes së shefit të shtetit. Sipas kreut të PDK-së, pozicioni i partisë që ai drejton mbetet i qartë: fillimisht kërkohet miratimi i ligjit në Kuvendin e Kosovës dhe vetëm pas këtij hapi mund të hapet rruga për diskutime rreth postit të presidentit, me qëllim gjetjen e një zgjidhjeje për vendin.