Vrasja në Aktash: Eksperti mjeko-ligjor zbulon detaje tronditëse rreth plagëve dhe shkakut fatal të vdekjes

Gjatë seancës gjyqësore të mbajtur këtë të premte në Gjykatën Themelore në Prishtinë për rastin e vrasjes në lagjen Aktash, është dëshmuar dëshmia kyçe e ekspertit të mjekësisë ligjore, Valon Hyseni, i cili ka hedhur dritë mbi rrethanat e vdekjes së viktimës. “Pas kryerjes së autopsisë të tani të ndjerit, kemi ardhur në përfundim që vdekja e tani të ndjerit është e dhunshme dhe ka ardhur si rrjedhojë e gjakderdhjes së jashtme dhe të brendshme në regjionin e kokës dhe dërmimit të trurit të vogël”, ka deklaruar eksperti Hyseni para trupit gjykues. Hyseni ka bërë të ditur se viktima ka marrë gjithsej pesë plagë nga armët e zjarrit, të shpërndara në kokë, krahun e majtë, bark, ijë dhe në kofshën e këmbës së djathtë. Sipas tij, të gjitha këto plagë kanë qenë tejshkuese, çka do të thotë se kishin vrimë hyrëse dhe dalëse, pa lënë predha brenda trupit. Përveç këtyre, në trup janë konstatuar vetëm disa gërvishtje dhe dëmtime të lëkurës të shkaktuara nga mjete të forta e të topitura, ndërsa u theksua se goditja në kokë ishte fatale dhe se të gjitha qitjet janë kryer nga një distancë mbi një metër. Eksperti gjithashtu sqaroi se analizat toksikologjike nuk u realizuan për shkak se laboratori i Institutit të Mjekësisë Ligjore ka dalë jashtë funksionit që nga viti 2023, mirëpo theksoi se mungesa e tyre nuk do të ndryshonte përfundimin mbi shkakun e vdekjes. Gjatë seancës, avokati i palës së dëmtuar, Kadri Mjekiqi, kërkoi mbylljen e dëgjimit të ekspertit për shkak të ndjeshmërisë së fotografive për familjarët, kërkesë e cila u hodh poshtë nga kryetarja e trupit gjykues, Fatime Dërmaku. Ndërkaq, dëshmitarja Rinora Dërmaku nuk mundi të paraqitej për arsye shëndetësore. Në aspektin procedurial, kujtojmë se në seancën fillestare të 6 majit 2026, të pandehurit Korab Gashi, Valdrin Ademi dhe Erd Marevci u deklaruan të pafajshëm për “Vrasje në tentativë” dhe “Armëmbajtje pa leje”. Ndërsa Robert Llumnica, Salih Sekiraqa dhe Fatos Abazi mohuan akuzat për “Vrasje të rëndë”, por pranuan fajësinë për “Armëmbajtje pa leje”. Qëndrime të ngjashme u shprehën edhe në seancën e 26 gushtit 2026, ku Gashi, Ademi dhe Marevci përsëritën pafajësinë e tyre, kurse Llumnica, Sekiraqa dhe Fatos Ajvazi refuzuan akuzën për vrasje të rëndë, por pranuan armëmbajtjen pa leje. Për të akuzuarin Vesel Bunjaku, i cili pranoi fajësinë për armëmbajtje pa leje dhe manipulim me prova, procedura u veçua dhe më 28 gusht 2026 ai u dënua me shtatë muaj burgim dhe dy mijë euro gjobë. Procesi gjyqësor ndaj Endrit Llapashticës dhe Dardan Marevcit ka nisur më 21 korrik 2026 në mungesë, pasi dy të pandehurit vazhdojnë të jenë të pakapshëm për organet e rendit. Përndryshe, Prokuroria Themelore në Prishtinë kishte ngritur aktakuzën më 12 shkurt 2026 ndaj gjithsej nëntë personave për këtë ngjarje të rëndë.