Pas 1 viti e gjysmë në arrati, flet para gjykatës ish-bashkëshorti i Xhuana Nikollit: E dhunova një ditë para tragjedisë

Pas një periudhe prej më shumë se një viti e gjysmë në arrati, Eraldo Fizi, ish-bashkëshorti i të ndjerës Xhuana Nikolli, ka dalë para Gjykatës së Tiranës për t'u njohur me masën e sigurisë. Prokuroria ka ngritur ndaj tij akuzat zyrtare për veprat penale të “Shkaktimit të vetëvrasjes” dhe “Dhunës në familje”, pasi i riu ishte vetëdorëzuar më herët në Drejtorinë Vendore të Policisë Lezhë. Gjatë seancës gjyqësore, Fizi deklaroi se ndodhet në një gjendje të rëndë psikologjike dhe se është i gatshëm të përballet me pasojat e veprimeve të tij. Ai pranoi para togave të zeza se kishte ushtruar dhunë ndaj Xhuanës vetëm një ditë para se ajo t'i jepte fund jetës, por njëkohësisht hodhi poshtë pretendimet se një sjellje e tillë ka qenë e vazhdueshme. I pyetur për detajet e ngjarjes, i dyshuari kërkoi kohë, duke theksuar se shpjegimet e plota do t'i japë në një moment të dytë. Në përfundim, Gjykata e Shkallës së Parë e Juridiksionit të Përgjithshëm Tiranë vendosi të lërë në fuqi masën e sigurimit personal “Arrest në burg” për Eraldo Fizin. Ngjarja e rëndë ndodhi pasi Xhuana Nikolli konsumoi lëndë helmuese të llojit fostoksinë dhe u dërgua urgjentisht në Qendrën Spitalore Universitare “Nënë Tereza”, ku nuk mundi të mbijetonte. Pas prishjes së martesës, e reja ishte shpërngulur nga qyteti i Lezhës dhe jetonte në Tiranë së bashku me disa mikesha në një banesë me qira. Sipas hetimeve paraprake, aktit fatal i kishte paraprirë dhuna e ushtruar ndaj saj, ku dyshimet kryesore bien pikërisht mbi ish-partnerin e saj, Eraldo Fizi. Paralelisht me këtë procedim penal, Agjencia e Mbikëqyrjes Policore ka nisur një hetim të veçantë ndaj zyrtarëve të policisë për të verifikuar nëse strukturat ligjzbatuese kanë reaguar dhe kanë marrë të gjitha masat e duhura kohë më parë kur është denoncuar rasti. Në zbatim të interesit të lartë publik, zyrtarisht bëhet e ditur se më datë 02.10.2026, Gjykata e Shkallës së Parë e Juridiksionit të Përgjithshëm Tiranë shqyrtoi kërkesën e organit të akuzës për vlefshmërinë e arrestit dhe caktimin e masës ndaj shtetasit E. F., i dyshuar për veprën penale të “Shkaktimit të vetëvrasjes”, të parashikuar nga neni 99 i Kodit Penal. Pas shqyrtimit të akteve dhe provave të paraqitura nga prokuroria, mbështetur në nenet përkatëse të Kodit të Procedurës Penale, gjykata vendosi pranimin e kërkesës së prokurorisë, duke lënë në fuqi masën e sigurimit “Arrest në burg” të caktuar më parë me vendimin nr. 643, datë 16.03.2026, dhe urdhëroi mbajtjen e të pandehurit në një institucion të paraburgimit. Ekzekutimi i këtij vendimi gjyqësor i është ngarkuar Prokurorisë pranë Gjykatës së Shkallës së Parë të Juridiksionit të Përgjithshëm Tiranë. Kundër këtij vendimi palët e pakënaqura kanë të drejtë të ushtrojnë ankim në Gjykatën e Apelit të Juridiksionit të Përgjithshëm brenda një afati prej pesë ditësh, i cili llogaritet nga dita e nesërme e njoftimit zyrtar të vendimit, të shpallur në Tiranë më datë 02.10.2026.