Zhegrova kërkon fanellën e titullarit ndaj Austrisë: Besoj te triumfi dhe kreu i grupit

Sulmuesi i Kombëtares së Kosovës, Edon Zhegrova, ka ndarë mendimet e tij pas barazimit pa gola kundër Izraelit, duke shprehur hapur ambicien për të qenë në formacionin bazë për sfidën e radhës. Në duelin e zhvilluar mbrëmë, ylli kosovar u hodh në fushë nga stoli në minutën e 77-të, por koha e kufizuar nuk mjaftoi për të zhbllokuar rezultatin, i cili mbeti i pandryshuar deri në fund, 0-0. Gjatë një prononcimi për platformën italiane SportMediaset, Zhegrova theksoi se aktivizimi i tij nga banka rezervë ishte zgjedhje taktike e trajnerit, ndërkohë që paralajmëroi synimet e tij për ndeshjen e ardhshme. “Të nisja nga stoli ishte vendim i trajnerit, mezi pres ndeshjen tjetër, shpresoj të filloj dhe të luaj”, u shpreh futbollisti. Për “Dardanët”, sfida e ardhshme rezervon një përballje madhore ndaj Austrisë, e cila aktualisht mban kryesimin e grupit. Zhegrova shfaqet tejet optimist se ekipi ka potencialin e duhur për të marrë tri pikët dhe për të synuar majën e tabelës. “Unë besoj në ekipin tim kombëtar, kemi lojtarë cilësorë, do të luajmë në shtëpi dhe mendoj se kemi një shans të mirë për të fituar, e njëjta gjë vlen edhe për grupin, do të bëjmë gjithçka për të përfunduar të parët”, shtoi ai. Vlen theksuar se Zhegrova ka qenë protagonist edhe në përballjen e mëparshme kundër austriakëve, ku pati gjetur rrugën e rrjetës me anë të një penalltie, pavarësisht se ndeshja e zhvilluar në Vjenë u mbyll me fitoren e vendasve 3-1.