Skandali te 'Les Bleus': Ish-shefi i sigurisë nën hetim për miliona euro të marra nga yjet e kombëtares

Një stuhi e vërtetë ka goditur ambientet e brendshme të kombëtares franceze të futbollit, pasi një dosje e ndjeshme ka nxjerrë në dritë praktika të dyshimta financiare. Në qendër të këtij skandali nuk ndodhet një futbollist, por Mohamed Sanhadji, i njohur gjerësisht si “Momo”, njeriu që për më shumë se dy dekada ishte një nga figurat më të besuara dhe të afërta me lojtarët brenda dhomës së zhveshjes. Hetimet e fundit kanë zbuluar se “Momo”, ish-shefi i sigurisë së ekipit, kishte përfituar shuma të konsiderueshme parash nga yjet e kombëtares, me Kylian Mbappé që figuron si donatori kryesor. Sipas të dhënave, sulmuesi i Real Madridit i kishte huazuar Sanhadjit 120 mijë euro për blerjen e një prone, përmes ndërmjetësimit të nënës dhe agjentes së tij, Fayza Lamari. Kjo shumë i shtohet një pagese prej 60,300 eurosh që lojtari ia kishte dhuruar si bonus pas Kupës së Botës në Katar, duke e çuar totalin e mbështetjes financiare në 180,300 euro. Në qershor të vitit 2023, Mbappé kishte vendosur të shpërndante shpërblimet e tij për stafin e sigurisë. Ndërsa katër oficerë të tjerë përfituan nga 30 mijë euro secili, Sanhadji mori një pjesë dukshëm më të madhe. Rrethi i afërt i Mbappés ka sqaruar se këto pagesa ishin shenjë mirënjohjeje dhe nuk kishin karakterin e një borxhi të kthyeshëm, ndërsa ndaj lojtarit nuk rëndon asnjë akuzë ligjore. Megjithatë, autoritetet financiare franceze, përmes njësisë “Tracfin”, sinjalizuan transaksionet e dyshimta në verën e vitit 2024. Prokuroria e Parisit nisi menjëherë një hetim paraprak për të verifikuar nëse këto shuma përfaqësonin donacione të mirëfillta apo paga të maskuara në këmbim të shërbimeve private. Dyshimet u forcuan nga udhëtimet private të Sanhadjit me Mbappén, përfshirë një vizitë në Kamerun pak pas marrjes së bonusit të diskutueshëm. Rrjeti i përfitimeve të Sanhadjit rezulton të jetë shumë më i gjerë. Nga viti 2020 deri në 2024, ai dyshohet se ka siguruar mbi 300 mijë euro nga rreth 15 lojtarë aktualë dhe ish-lojtarë të kombëtares. Emra të njohur si Raphaël Varane, Laurent Blanc, Sabri Lamouchi, Yann M’Vila dhe Matteo Guendouzi kanë qenë pjesë e listës së personave që i kanë dhënë hua financiare ish-shefit të sigurisë. Presioni mbi Sanhadjin ka qenë i lartë, siç dëshmohet nga mesazhet e tij drejtuar lojtarëve, ku shprehte frikën se zbulimi i këtyre transaksioneve do të shënonte fundin e karrierës së tij. Pas një hetimi të Inspektoratit të Përgjithshëm, i cili konstatoi se ai kishte fshehur marrjen e parave nga eprorët, Mohamed Sanhadji u detyrua të pensionohej parakohshëm në fund të vitit 2025.