Latifi shpëton Maqedoninë e Veriut U-21 nga humbja ndaj Malit të Zi

Përfaqësuesja e Maqedonisë së Veriut për grupmoshën U-21 ka barazuar me rezultatin 1:1 në përballjen e zhvilluar kundër Malit të Zi, e cila u zhvillua në stadiumin “Petar Milloshevski” në Manastir, në kuadër të ciklit kualifikues për Kampionatin Evropian. Skuadra mysafire e nisi takimin me një iniciativë më të theksuar, duke ushtruar presion të vazhdueshëm në portën vendase. Dominimi i malazezëve u shpërblye në minutën e 44-të, kur pas një aksioni të organizuar mirë nga Savoviq, sulmuesi Kostiq gjeti rrugën e rrjetës duke kaluar ekipin e tij në epërsi, 0:1. Në pjesën e dytë, Maqedonia e Veriut reagoi shpejt dhe në minutën e 57-të arriti të barazojë shifrat. Pas një asistimi të Veliçkovskit, Tashovski u ndal në mënyrë të parregullt nga mbrojtësi Dakiq brenda zonës së rreptësisë. Gjyqtari akordoi penallti, të cilën Admir Latifi e shndërroi në gol me saktësi, duke vendosur baraspeshën përfundimtare 1:1. Në çastet e fundit të takimit, vendasit patën një mundësi të artë për ta përmbysur rezultatin, por goditja me kokë e Ariton Mehmedit nga një pozitë ideale përfundoi mbi portë. Sa i përket paraqitjes së futbollistëve, Adis Murati dhe Admir Latifi luajtën gjatë të gjithë takimit, Rexhep Murati u aktivizua për 88 minuta, ndërsa Ariton Mehmedi dhe Ditmir Hoxha hynë në lojë në minutën e 88-të. Pas përfundimit të xhiros së nëntë në Grupin E, Mali i Zi renditet në pozitën e tretë me 11 pikë, ndërsa Maqedonia e Veriut pozicionohet në vendin e pestë me 7 pikë të tubuara.