Përballja me Izraelin në Debrecen, Xhevat Kurti: Besojmë te triumfi, pret gola nga yjet e sulmit

Kombëtarja e Kosovës është plotësisht e gatshme për sfidën e mbrëmjes së sotme në Debrecen, ku do të matë forcat me Izraelin në kuadër të Ligës B të Kombeve. Ndeshja, e cila është parashikuar të nisë në orën 20:45, e gjen Përfaqësuesen e Kosovës me epërsi në aspektin e cilësisë krahasuar me kundërshtarin, teksa djemtë tanë synojnë regjistrimin e fitores së dytë në këtë edicion, krahas një humbjeje të regjistruar deri më tani. Ish-futbollisti i njohur, Xhevat Kurti, shpreh besimin dhe optimizmin e tij se “Dardanët” do t’ia dalin të rrëmbejnë tri pikët e plota nga ky duel delikat ndaj izraelitëve. “Kemi një mbrojtje të hendikepuar, por një sulm të frikshëm! Trajneri Foda do të ketë një detyrë të vështirë për ta përgatitur ekipin për këtë ndeshje, pasi Kosova do të paraqitet me disa mungesa të rëndësishme në mbrojtje”, u shpreh Kurti. Mungesat në repartin defensiv mbeten burim shqetësimi për analistin, i cili thekson peshën e madhe që kanë lojtarët e fazës mbrojtëse që nuk do të mund të kontribuojnë. “Pa Aro Muricin, Hajdarin dhe, padiskutim, Rrahmanin, jemi të hendikepuar në prapavijë. Megjithatë, kemi një mesfushë shumë të mirë, me Avdullahun si dirigjent të lojës sonë”, nënvizoi ai. Në vijim, ish-lojtari i mirënjohur ka veçuar edhe futbollistët që pritet të mbajnë barrën kryesore dhe të bëjnë diferencën në fushën e gjelbër gjatë kësaj përballjeje. “Në sulm, Kosova ka shumë potencial. Asllani dhe Muriqi, së bashku me Zhegrovën, mund të jenë rrezik për çdo mbrojtje. Ndërsa Gallapeni dhe Vojvoda janë dy asete shumë të rëndësishme për ekipin tonë. Ndeshja nuk do të jetë aspak e lehtë, por besojmë te fitorja! Presim që Asllani, Muriqi ose Zhegrova të shënojnë dhe së bashku ta shijojmë një fitore të madhe të Kosovës!”, përfundoi Xhevat Kurti.