Haxhiu i shpreh Von der Leyen shqetësimin e Kosovës për vendimin e Hagës dhe kërkon mbështetje për integrimin

Ushtruesja e Detyrës së Presidentes së Republikës së Kosovës, Albulena Haxhiu, ka zhvilluar një takim zyrtar me Presidenten e Komisionit Evropian, Ursula von der Leyen. Gjatë këtij takimi, bashkëbiseduesit trajtuan zhvillimet aktuale politike në vend, duke vënë theksin te rëndësia e përmbylljes me sukses të procesit të zgjedhjes së Presidentit brenda afateve kushtetuese. Kreu i shtetit në detyrë, Haxhiu, ngriti shqetësimin e thellë të qytetarëve dhe institucioneve të Kosovës lidhur me vendimin e fundit të Dhomave të Specializuara në Hagë, të cilësuar prej saj si të padrejtë. “Nënvizova se institucionet e Kosovës do të vazhdojnë t’i mbështesin ekipet mbrojtëse të Hashim Thaçit, Kadri Veselit, Rexhep Selimit dhe Jakup Krasniqit në procesin e apelit. Në këtë drejtim, do të angazhohemi për hartimin e një strategjie të përbashkët shtetërore, duke i bashkërenduar veprimet me ekipet mbrojtëse dhe ekspertët, në mënyrë që mbështetja jonë t’u shërbejë sa më mirë atyre në këtë proces”, ka deklaruar U.D. Presidentja Haxhiu. Po ashtu, gjatë bisedës, ajo kërkoi nga Bashkimi Evropian që të ndërmarrë hapa konkretë për shqyrtimin e aplikimit të Kosovës për anëtarësim, i dorëzuar më 14 dhjetor 2022, duke kërkuar njëkohësisht mbështetjen dhe angazhimin personal të Presidentes Von der Leyen në këtë drejtim.